വിൻഡീസിനെതിരായ രണ്ടാം ടി20, ഇന്ത്യൻ ടീമില്‍ ഒരേയൊരു മാറ്റം, പ്ലേയിംഗ് ഇലവനെ തിരഞ്ഞെടുത്ത് ചേതേശ്വര്‍ പൂജാര

റാഞ്ചി: വെസ്റ്റ് ഇൻഡീസിനെതിരായ അഞ്ച് മത്സരങ്ങളുടെ ടി20 പരമ്പരയിലെ രണ്ടാം പോരാട്ടത്തിന് വെള്ളിയാഴ്ച റാഞ്ചിയിൽ തുടക്കമാകാനിരിക്കെ, ഇന്ത്യയുടെ സാധ്യതാ പ്ലേയിംഗ് ഇലവനെ തെരഞ്ഞെടുത്ത് മുൻ ഇന്ത്യൻ താരം ചേതേശ്വർ പുജാര. ആദ്യ മത്സരത്തിൽ മികച്ച വിജയം നേടിയതിനാൽ ടീമിൽ വലിയ മാറ്റങ്ങൾക്ക് സാധ്യതയില്ലെന്നും എന്നാൽ പേസർമാരിൽ മയാങ്ക് യാദവിന് പകരം പ്രിൻസ് യാദവിനെ ഉൾപ്പെടുത്താൻ സാധ്യതയുണ്ടെന്നും പുജാര വ്യക്തമാക്കി.

ലക്നൗവിൽ നടന്ന ആദ്യ പോരാട്ടത്തിൽ എട്ട് വിക്കറ്റിന്റെ മിന്നും വിജയം നേടിയ ഇന്ത്യ പരമ്പരയിൽ 1-0ന് മുന്നിലാണ്. എന്നാൽ, മത്സരത്തിൽ നാല് ഓവറിൽ 40 റൺസ് വിട്ടുകൊടുത്ത് ഒരു വിക്കറ്റ് മാത്രം വീഴ്ത്തിയ മയാങ്ക് യാദവിന്റെ പ്രകടനം നിരാശപ്പെടുത്തിയിരുന്നു. ജിയോഹോട്ട്സ്റ്റാറിലെ 'ഗെയിം പ്ലാൻ' എന്ന പരിപാടിയിലാണ് പുജാര തന്റെ അഭിപ്രായം പങ്കുവെച്ചത്.

ഇന്ത്യയുടെ ബാറ്റിംഗ് നിരയിൽ മാറ്റങ്ങൾ ആവശ്യമില്ലെന്ന് പുജാര ചൂണ്ടിക്കാട്ടി. സഞ്ജു സാംസണും അഭിഷേക് ശർമ്മയും തന്നെ ഇന്നിംഗ്സ് ഓപ്പൺ ചെയ്യണം. ഇഷാൻ കിഷൻ മൂന്നാമതായും നായകൻ ശ്രേയസ് അയ്യർ നാലാമതായും ബാറ്റിംഗിനിറങ്ങണം. മത്സര സാഹചര്യത്തിനനുസരിച്ച് തിലക് വർമ്മ, നമൻ ധീർ, ശിവം ദുബെ എന്നിവർ അഞ്ച്, ആറ്, ഏഴ് സ്ഥാനങ്ങളിൽ കളിക്കട്ടെ എന്നും അദ്ദേഹം പറഞ്ഞു.

അക്സർ പട്ടേൽ, കുൽദീപ് യാദവ്, അർഷ്ദീപ് സിംഗ് എന്നിവർ പ്ലേയിംഗ് ഇലവനിൽ സ്ഥാനം ഉറപ്പിച്ചവരാണ്. മയാങ്ക് യാദവിന് പകരം പ്രിൻസ് യാദവിനെ കൊണ്ടുവരണമോ എന്നത് മാത്രമാണ് മാനേജ്‌മെന്റിന് മുന്നിലുള്ള ഏക സംശയം. എന്നാൽ ഒരു മത്സരത്തിലെ പ്രകടനം മാത്രം വിലയിരുത്തി കളിക്കാരെ ടീമിൽ നിന്ന് മാറ്റരുതെന്നും മയാങ്കിന് ഒരു അവസരം കൂടി നൽകണമെന്നാണ് തന്റെ അഭിപ്രായമെന്നും പുജാര കൂട്ടിച്ചേർത്തു.

ആദ്യ മത്സരത്തിൽ പവർപ്ലേയിൽ തന്നെ അർഷ്ദീപ് സിംഗ് മൂന്ന് ഓവറുകൾ എറിഞ്ഞതിനെയും പുജാര ന്യായീകരിച്ചു. മയാങ്ക് യാദവിന് റൺസ് നിയന്ത്രിക്കാൻ കഴിയാതിരുന്നതാണ് അർഷ്ദീപിനെ കൂടുതൽ ഓവറുകൾ ഏൽപ്പിക്കാൻ ശ്രേയസ് അയ്യരെ പ്രേരിപ്പിച്ചത്. അതേസമയം, രണ്ട് പ്രധാന പേസർമാർ മാത്രം കളിക്കുന്ന ടീമിൽ ഒരാളെക്കൊണ്ട് പവർപ്ലേയിൽ തന്നെ മൂന്ന് ഓവറുകൾ എറിയിക്കുന്നത് ദീർഘകാലാടിസ്ഥാനത്തിൽ ശരിയല്ലെന്നും മറ്റ് ബൗളർമാർ അർഷ്ദീപിന് മികച്ച പിന്തുണ നൽകേണ്ടതുണ്ടെന്നും അദ്ദേഹം ഓർമ്മിപ്പിച്ചു.

പുജാര തിരഞ്ഞെടുത്ത ഇന്ത്യയുടെ പ്ലേയിംഗ് ഇലവൻ: സഞ്ജു സാംസൺ, അഭിഷേക് ശർമ്മ, ഇഷാൻ കിഷൻ, ശ്രേയസ് അയ്യർ (ക്യാപ്റ്റൻ), തിലക് വർമ്മ, നമൻ ധീർ, ശിവം ദുബെ, അക്സർ പട്ടേൽ, കുൽദീപ് യാദവ്, അർഷ്ദീപ് സിംഗ്, മയാങ്ക് യാദവ്.