ചേർത്തല: നാട്ടുകാരും ഹരിതകർമസേനയും സംരക്ഷിച്ചുവന്ന എ.എസ് കനാലിൽ ടാങ്കറിൽ കക്കൂസ് മാലിന്യം തള്ളിയ കേസിൽ കൊക്കോതമംഗലം ജോബി (43), മുഹമ്മ വിനോദ് (53) എന്നിവരെ ചേർത്തല പൊലീസ് അറസ്റ്റ് ചെയ്തു. പ്രതികളെ സ്ഥലത്തെത്തിച്ച് തെളിവെടുപ്പ് നടത്തിയ പൊലീസ്, പൊതുസ്ഥലങ്ങളിൽ മാലിന്യം തള്ളുന്നവർക്കെതിരെ ശക്തമായ നിയമനടപടി സ്വീകരിക്കുമെന്ന് മുന്നറിയിപ്പ് നൽകി.
വാഹനാപകടത്തിൽ പരിക്കേറ്റയാളുടെ സ്വർണമാല കവർന്ന കേസിൽ പുന്നപ്ര സ്വദേശി അഷ്കറിനെ (34) അമ്പലപ്പുഴ പൊലീസ് മണിക്കൂറുകൾക്കുള്ളിൽ അറസ്റ്റ് ചെയ്തു. ആശുപത്രിയിലേക്ക് കൊണ്ടുപോയ ഓട്ടോയിൽ കയറിപ്പറ്റി മാല പൊട്ടിച്ചോടിയ മുൻ ലഹരിമരുന്ന് കേസ് പ്രതിയെ കുറവൻതോട് ജങ്ഷനിൽ നിന്നാണ് പൊലീസ് പിടികൂടിയത്.
പ്രിയദർശിനി സൗജന്യ യാത്രാ പദ്ധതി ഹിറ്റായതോടെ ആലപ്പുഴയിലെ കെ.എസ്.ആർ.ടി.സി ഡിപ്പോകളിൽ യാത്രക്കാരുടെയും പ്രതിദിന വരുമാനത്തിന്റെയും എണ്ണത്തിൽ വലിയ വർധന രേഖപ്പെടുത്തി. എന്നാൽ, വർധിച്ച തിരക്കിനനുസരിച്ച് ബസുകൾ ലഭ്യമല്ലാത്തതും തകരാറിലാകുന്നവയ്ക്ക് പകരം സംവിധാനമില്ലാത്തതും റൂട്ടുകളിൽ യാത്രാക്ലേശത്തിന് കാരണമാകുന്നു.
കുടിശിക തുകയായ 60 കോടിയോളം രൂപ ലഭിക്കാത്തതിനെത്തുടർന്ന് മില്ലുടമകൾ ധാരണാപത്രത്തിൽ ഒപ്പുവെക്കാൻ വിസമ്മതിക്കുന്നത് നെല്ല് സംഭരണത്തെ പ്രതിസന്ധിയിലാക്കുന്നു. രണ്ടാംകൃഷി വിളവെടുപ്പ് തുടക്കത്തിൽ തന്നെ മില്ലുകൾ മുഖം തിരിക്കുന്നത് പാടത്ത് നെല്ല് കെട്ടിക്കിടന്ന് തൂക്കം കുറയുമോയെന്ന കടുത്ത ആശങ്കയിലാണ് കർഷകർ.
അയൽസംസ്ഥാനങ്ങളിലെ കനത്ത മഴയെ തുടർന്ന് വരവ് കുറഞ്ഞതോടെ സംസ്ഥാനത്ത് പച്ചക്കറി വില കുതിച്ചുയരുന്നു. വെളുത്തുള്ളി, ബീൻസ്, പയർ, ചെറിയ ഉള്ളി എന്നിവയ്ക്ക് വൻ വിലവർധനവ് നേരിട്ടതോടെ കുടുംബങ്ങളും ഹോട്ടൽ മേഖലയും കടുത്ത പ്രതിസന്ധിയിലാണ്.
സിപിഎമ്മിനെതിരെ വീണ്ടും വിവാദ പരാമർശവുമായി ജി സുധാകരൻ. പിണറായി വിജയനെ ഇല്ലാതാക്കാൻ വിഎസ് നേരിട്ട് രംഗത്തിറങ്ങിയെന്നാണ് ജി സുധാകരൻ്റെ പരാമർശം.