പയ്യന്നൂരിൽ അനസ്തീഷ്യക്ക് പിന്നാലെ ഒന്നര വയസുകാരൻ ദേവാൻഷ് ശൗര്യയുടെ മരണം; 3 ഡോക്‌ടർമാരെക്കൂടി പ്രതി ചേർത്തു

കണ്ണൂർ: പയ്യന്നൂരിൽ അനസ്തീഷ്യ നൽകിയതിന് പിന്നാലെ ഒന്നര വയസ്സുകാരൻ ദേവാൻഷ് ശൗര്യ മരിച്ച സംഭവത്തിൽ മൂന്ന് ഡോക്ടർമാരെക്കൂടി പൊലീസ് പ്രതി ചേർത്തു. പയ്യന്നൂർ ബേബി മെമ്മോറിയൽ ആശുപത്രിയിലെ ആർ.എം.ഒ ഡോ. ഫ്രഡി ജോസഫ്, ഡോ. ആശ, ഡോ. ആരതി എന്നിവർക്കെതിരെയാണ് പുതുതായി കേസെടുത്തിരിക്കുന്നത്. മനപ്പൂർവ്വമല്ലാത്ത നരഹത്യയ്ക്കാണ് (IPC 304A) നടപടി.

കുട്ടിയുടെ മരണത്തിൽ ഗുരുതരമായ ചികിത്സാപ്പിഴവ് സംഭവിച്ചിട്ടുണ്ടെന്ന സംസ്ഥാനതല വിദഗ്ധ സമിതിയുടെ അന്വേഷണ റിപ്പോർട്ടിന്റെ അടിസ്ഥാനത്തിലാണ് പയ്യന്നൂർ പൊലീസിന്റെ നടപടി. കേസിൽ അനസ്തീഷ്യ നൽകിയ ഡോ. അഞ്ജലിയെ നേരത്തെ പ്രതി ചേർത്തിരുന്നു.

ഇക്കഴിഞ്ഞ ജൂലൈ 10-നാണ് കേസിനാസ്പദമായ സംഭവം. ശസ്ത്രക്രിയക്കായി അനസ്തീഷ്യ നൽകിയതിന് പിന്നാലെ കുട്ടി ബോധരഹിതനാവുകയും തുടർന്ന് മരിക്കുകയുമായിരുന്നു. സംഭവത്തിൽ പൊലീസ് അന്വേഷണം വൈകുകയാണെന്ന് ആരോപിച്ച് കുട്ടിയുടെ കുടുംബം രംഗത്തെത്തിയിരുന്നു. തുടർന്ന് ആരോഗ്യമന്ത്രിക്ക് നേരിട്ട് പരാതി നൽകുകയും ചെയ്തു. സംസ്ഥാനതല വിദഗ്ധ സമിതിയുടെ റിപ്പോർട്ട് ലഭിക്കുന്നതിൽ വന്ന താമസമാണ് മേൽനടപടികൾ വൈകാൻ കാരണമെന്നായിരുന്നു പൊലീസിന്റെ വിശദീകരണം. റിപ്പോർട്ട് സമർപ്പിക്കപ്പെട്ടതോടെയാണ് കൂടുതൽ ഡോക്ടർമാർക്കെതിരെ കേസെടുത്തത്.