പോയത് ഒരു സ്ത്രീ ഉണ്ടെന്ന ധൈര്യത്തില്‍ ; ഏറ്റവും ക്രൂര ലൈംഗികപീഡനം നടത്തിയത് അവര്‍ ; അതിജീവിതയുടെ മൊഴി

കൊച്ചി: കളമശ്ശേരി കൂട്ടബലാത്സംഗക്കേസിൽ അതിജീവിത നൽകിയ ഞെട്ടിക്കുന്ന മൊഴിയുടെ വിവരങ്ങൾ പുറത്ത്. മറ്റൊരു സ്ത്രീ കൂടെയുണ്ടെന്ന ധൈര്യത്തിലാണ് താൻ അവിടെ പോയതെന്നും എന്നാൽ 'അമ്മു' എന്ന് വിളിക്കുന്ന ശരണ്യയിൽ നിന്നാണ് തനിക്ക് ഏറ്റവും ക്രൂരമായ പീഡനം നേരിടേണ്ടി വന്നതെന്നും അതിജീവിത വ്യക്തമാക്കി.

ഐസ്‌ക്രീമിലും മറ്റ് ഭക്ഷണപദാർത്ഥങ്ങളിലും രാസലഹരി കലർത്തി നൽകിയാണ് പ്രതികൾ തന്നെ ക്രൂരമായി പീഡിപ്പിച്ചത്. കേസിൽ സഞ്ജു, ശരണ്യ എന്നിവരെ വയനാട് പുൽപ്പള്ളി താഴെയങ്ങാടിയിലെ ഹോട്ടലിൽ നിന്ന് പുൽപ്പള്ളി പോലീസ് അറസ്റ്റ് ചെയ്തിരുന്നു. സംഭവത്തിൽ നാലുപേർക്ക് പുറമെ മറ്റ് രണ്ടുപേർക്കായി പോലീസ് തെരച്ചിൽ ശക്തമാക്കിയിട്ടുണ്ട്.

സ്പായുടെ മറവിൽ നിയമവിരുദ്ധ സെക്‌സ് റാക്കറ്റ്

സ്പായുടെ മറവിൽ പെൺകുട്ടികളെ എത്തിച്ചുനൽകുന്ന വലിയൊരു അനധികൃത ലഹരി-സെക്‌സ് റാക്കറ്റാണ് സംഭവത്തിന് പിന്നിലെന്ന് പോലീസ് കണ്ടെത്തി. അതിക്രമം നടന്ന സ്പാ ലൈസൻസില്ലാതെയാണ് പ്രവർത്തിച്ചിരുന്നത്. സംഭവസ്ഥലത്തെ ലോഡ്ജിലെ സി.സി.ടി.വി ക്യാമറകൾ പ്രവർത്തിക്കുന്നില്ലെങ്കിലും സ്പായിലെ ദൃശ്യങ്ങൾ ശേഖരിക്കാനുള്ള തീവ്രശ്രമത്തിലാണ് പോലീസ്.

അതിക്രമത്തിന് ശേഷം ആശുപത്രിയിൽ ചികിത്സയിൽ കഴിയുന്ന അതിജീവിത അന്വേഷണസംഘത്തോട് പൂർണ്ണമായി സഹകരിക്കുന്നുണ്ട്. സംഭവത്തിൽ സംസ്ഥാന വനിതാ കമ്മീഷൻ സ്വമേധയാ കേസെടുത്തിട്ടുണ്ട്. പ്രതികളുടെ ഗുണ്ടാബന്ധം, ലഹരിമരുന്നിന്റെ ഉറവിടം, അനധികൃത സെക്സ് റാക്കറ്റുകൾ എന്നിവയെ കേന്ദ്രീകരിച്ച് അന്വേഷണം വിപുലീകരിക്കാനാണ് പോലീസിന്റെ തീരുമാനം. കൊച്ചി നഗരത്തിൽ ലൈസൻസില്ലാതെയും നിയമവിരുദ്ധമായും പ്രവർത്തിക്കുന്ന എല്ലാ സ്പാകളെക്കുറിച്ചും അന്വേഷിക്കുമെന്ന് പോലീസ് വ്യക്തമാക്കി.