ബുംറയും വൈഭവും തിരിച്ചെത്തും, സഞ്ജു തുടരും, 2 മാറ്റം ഉറപ്പ്, ഏഷ്യൻ ഗെയിംസ് ക്വാർട്ടറിൽ അഫ്ഗാനെതിരെ ഇന്ത്യയുടെ സാധ്യതാ ഇലവൻ

നിഷിൻ (ജപ്പാൻ): ഏഷ്യൻ ഗെയിംസ് പുരുഷ ക്രിക്കറ്റിലെ രണ്ടാം ക്വാർട്ടർ ഫൈനലിൽ നാളെ ഇന്ത്യ അഫ്ഗാനിസ്ഥാനെ നേരിടും. കോറോഗി സ്പോർട്സ് പാർക്കിൽ നടക്കുന്ന മത്സരത്തിൽ സ്റ്റാർ പേസർ ജസ്പ്രീത് ബുംറയും മലയാളി താരം സഞ്ജു സാംസണും ഉൾപ്പെടുന്ന കരുത്തുറ്റ ഇലവനെ അണിനിരത്താനാണ് ഇന്ത്യൻ മാനേജ്‌മെൻ്റെ നീക്കം. കഴിഞ്ഞ ആഴ്ച ന്യൂഡൽഹിയിൽ നടന്ന അഫ്ഗാനിസ്ഥാനെതിരായ ടി20 പരമ്പരയിൽ കളിച്ച ബുംറക്ക് ജപ്പാനെതിരായ മത്സരത്തിൽ വിശ്രമം അനുവദിച്ചിരുന്നു. ഒരു ഓവർ പോലും എറിയാത്ത യാഷ് താക്കൂറിന് പകരക്കാരനായി ബുംറ പ്ലേയിംഗ് ഇലവനിലേക്ക് തിരിച്ചെത്താനാണ് സാധ്യത. ഇതിനൊപ്പം തുടർച്ചയായ തിരിച്ചടികൾ നേരിടുന്ന ശിവം ദുബെയ്ക്ക് പകരം 15-കാരൻ വൈഭവ് സൂര്യവംശിയെയും ടീമിൽ ഉൾപ്പെടുത്തിയേക്കും. വൈഭവ് അഭിഷേക് ശർമ്മയ്ക്കൊപ്പം ഓപ്പണറായാൽ, ഐ.പി.എല്ലിൽ രാജസ്ഥാൻ റോയൽസിനായി മൂന്നാമനായി കളിച്ച് മികച്ച പരിചയസമ്പത്തുള്ള സഞ്ജു സാംസൺ മൂന്നാം നമ്പറിലേക്ക് മാറും. ഇതോടെ ഇഷാൻ കിഷൻ നാലാമതും ക്യാപ്റ്റൻ ശ്രേയസ് അയ്യർ അഞ്ചാമതുമാകും ബാറ്റിംഗിനിറങ്ങുക.

ഓപ്പണർ അഭിഷേക് ശർമ്മ, വിക്കറ്റ് കീപ്പർമാരായ ഇഷാൻ കിഷൻ, സഞ്ജു സാംസൺ എന്നിവരിലാണ് ഇന്ത്യയുടെ പ്രധാന ബാറ്റിംഗ് പ്രതീക്ഷകൾ. അഫ്ഗാനെതിരായ ദ്വിരാഷ്ട്ര പരമ്പരയിലെ മികച്ച താരമായി തിരഞ്ഞെടുക്കപ്പെട്ട അഭിഷേക് ശർമ്മ ജപ്പാനെതിരെ ആദ്യ പന്തിൽ പുറത്തായത് തിരിച്ചടിയായെങ്കിലും ടീമിൻ്റെ പ്രതീക്ഷ ഉയർന്നതാണ്. മഴമൂലം അഞ്ച് ഓവറാക്കി ചുരുക്കിയ ജപ്പാനെതിരായ മത്സരത്തിൽ അക്‌സർ പട്ടേൽ, രവി ബിഷ്‌ണോയ്, വാഷിംഗ്ടൺ സുന്ദർ എന്നിവരാണ് ബോളിംഗ് നിരയെ നയിച്ചത്. സ്പിന്നിനെ തുണക്കുന്ന പിച്ചിൽ ക്വാർട്ടർ ഫൈനലിലും ഈ സ്പിൻ ത്രയം തുടരാനാണ് സാധ്യത.