പാക്കിസ്ഥാന്‍ ക്രിക്കറ്റിനെ രക്ഷിക്കാന്‍ അക്തര്‍ വരുന്നു, ക്രിക്കറ്റ്‌ ബോര്‍ഡില്‍ നിര്‍ണായക റോള്‍ ലഭിച്ചേക്കും, കൂടിക്കാഴ്‌ചകള്‍ പൂര്‍ത്തിയായി

ഇസ്‌ലാമാബാദ്: പ്രതിസന്ധിയിലായ പാകിസ്താൻ ക്രിക്കറ്റിനെ തിരികെ കൈപിടിച്ചുയർത്താൻ മുൻ വേഗരാജാവ് ശുഐബ് അക്തർ എത്തുന്നു. പാകിസ്താൻ ക്രിക്കറ്റ് ബോർഡിൽ (പി.സി.ബി) നിർണായക പദവി അക്തറിന് ലഭിച്ചേക്കുമെന്നാണ് സൂചന. ഇതുമായി ബന്ധപ്പെട്ട് പി.സി.ബി ചെയർമാൻ മൊഹ്സിൻ നഖ്‌വിയുമായി അക്തർ കഴിഞ്ഞ ആഴ്ച രണ്ട് റൗണ്ട് ചർച്ചകൾ പൂർത്തിയാക്കി.

ഇംഗ്ലണ്ട് പര്യടനത്തിലെ പാക് ടീമിന്റെ ദയനീയ പ്രകടനത്തിന് പിന്നാലെ, ബോർഡിന്റെ ഭരണസമിതിയിലും സെലക്ഷൻ കമ്മിറ്റിയിലും വൻ അഴിച്ചുപണി നടത്താൻ പി.സി.ബി തീരുമാനിച്ചിരുന്നു. ഇതിന്റെ ഭാഗമായാണ് അക്തറുമായി പി.സി.ബി ചെയർമാൻ വിശദമായ ചർച്ച നടത്തിയത്. പൂർണ്ണമായും പാക് ക്രിക്കറ്റിന്റെ പുനരുദ്ധാരണം ലക്ഷ്യമിട്ടായിരുന്നു കൂടിക്കാഴ്ചയെന്ന് ഉന്നത വൃത്തങ്ങൾ സ്ഥിരീകരിച്ചു.

മുമ്പ് ചീഫ് സെലക്ടർ സ്ഥാനത്തേക്ക് അക്തറിന്റെ പേര് പരിഗണിച്ചിരുന്നെങ്കിലും, അന്നത്തെ പി.സി.ബിയുടെ കടുത്ത വിമർശകനായിരുന്ന അക്തർ താല്പര്യം പ്രകടിപ്പിച്ചിരുന്നില്ല. എന്നാൽ, നിലവിലെ പി.സി.ബി ചെയർമാനുമായി അടുത്ത ബന്ധം പുലർത്തുന്ന അക്തർ, പാക് ക്രിക്കറ്റിന്റെ നിലവാരം ഉയർത്താനുള്ള നിർദേശങ്ങൾ അദ്ദേഹത്തിന് മുന്നിൽ സമർപ്പിച്ചിട്ടുണ്ട്. ഇത് അനുകൂലമായി പരിഗണിക്കപ്പെടുന്നു എന്നത് ശ്രദ്ധേയമാണ്.

ഇംഗ്ലണ്ടിനെതിരായ പരമ്പരയിലെ കനത്ത തോൽവിക്ക് പിന്നാലെ സെലക്ഷൻ കമ്മിറ്റിയിൽ നിന്ന് മുൻ ക്യാപ്റ്റൻ മിസ്ബാഹുൽ ഹഖ് രാജിവെച്ചിരുന്നു. നിലവിലെ ചീഫ് സെലക്ടർ ആഖിബ് ജാവേദിനെ ചുമതലയിൽ നിന്ന് മാറ്റാനും പി.സി.ബി നീക്കം നടത്തുന്നുണ്ട്.