അർജന്‍റീന ജേഴ്‌‌സിയിൽ ലിയോണൽ മെസിയുടെ അവസാന പോരാട്ടം, ഇന്ത്യയിൽ മത്സരം കാണാനുള്ള വഴികള്‍, സമയം

ബ്യൂണസ് അയേഴ്സ്: രണ്ടു പതിറ്റാണ്ടിലേറെ നീണ്ട ഇതിഹാസ സമാനമായ അന്താരാഷ്ട്ര ഫുട്ബോൾ കരിയറിന് പൂർണ്ണവിരാമമിടാൻ അർജന്റീനയുടെ നായകൻ ലിയോണൽ മെസി നാളെ മൈതാനത്തിറങ്ങുന്നു. അർജന്റീന സമയം നാളെ രാത്രി എട്ടിന് (ഇന്ത്യൻ സമയം ബുധനാഴ്ച പുലർച്ചെ 4.30) നടക്കുന്ന സൗഹൃദ മത്സരത്തിൽ ആഫ്രിക്കൻ കരുത്തരായ ബെനിനാണ് അർജന്റീനയുടെ എതിരാളികൾ. ഈ പോരാട്ടത്തോടെ 39കാരനായ മെസി നീലയും വെള്ളയും വരയുള്ള അർജന്റീന ജേഴ്സിയോട് വിടപറയും.

ബ്യൂണസ് അയേഴ്സിലെ വിഖ്യാതമായ എസ്റ്റാഡിയോ മാസ മോണുമെന്റൽ സ്റ്റേഡിയത്തിൽ 85,000ത്തോളം വരുന്ന കാണികളെ സാക്ഷി നിർത്തിയാകും മെസിയുടെ വിടവാങ്ങൽ മത്സരം. 2022 ലോകകപ്പ് ജേതാക്കളായ സഹതാരങ്ങളും അർജന്റീനയുടെ യുവനിരയും അവിസ്മരണീയമായ ഈ നിമിഷത്തിൽ മെസിക്കൊപ്പം കളത്തിലിറങ്ങും. മെസിക്കൊപ്പം അർജന്റീനയുടെ വൈസ് ക്യാപ്റ്റനും വെറ്ററൻ ഡിഫൻഡറുമായ നിക്കോളാസ് ഒട്ടമെൻഡിയും (38) ഈ മത്സരത്തോടെ അന്താരാഷ്ട്ര ഫുട്ബോളിൽ നിന്ന് വിരമിക്കും.

നേട്ടങ്ങളുടെ കൊടുമുടിയിൽ വിടവാങ്ങൽ

അന്താരാഷ്ട്ര ഫുട്ബോളിലെ നിരവധി ചരിത്ര റെക്കോർഡുകൾ സ്വന്തം പേരിൽ കുറിച്ചാണ് മെസിയുടെ പടിയിറക്കം. ബെനിനെതിരായ മത്സരത്തോടെ അർജന്റീനയ്ക്കായി 208 മത്സരങ്ങൾ തികയ്ക്കുന്ന മെസി, ദേശീയ ജേഴ്സിയിൽ 125 ഗോളുകളും 68 അസിസ്റ്റുകളും സ്വന്തമാക്കിയിട്ടുണ്ട്.

2022 ഖത്തർ ലോകകപ്പ് കിരീടം, രണ്ട് കോപ്പ അമേരിക്ക ട്രോഫികൾ, ഒരു ഫൈനലിസിമ കിരീടം എന്നിവ അർജന്റീനയ്ക്ക് സമ്മാനിച്ച ശേഷമാണ് ഇതിഹാസ താരത്തിന്റെ മടക്കം. രണ്ട് തവണ അർജന്റീനയെ ലോകകപ്പ് ഫൈനലിലേക്ക് നയിക്കാനും മെസിക്ക് സാധിച്ചു.

ഇന്ത്യയിൽ മത്സരം തത്സമയം എങ്ങനെ കാണാം?

ഇന്ത്യൻ സമയം ബുധനാഴ്ച പുലർച്ചെ 04.30നാണ് മത്സരം ആരംഭിക്കുന്നത്. സൗഹൃദ മത്സരമായതിനാൽ ഇന്ത്യയിലെ ടെലിവിഷൻ ചാനലുകളിൽ തത്സമയ സംപ്രേക്ഷണം ലഭ്യമായിരിക്കില്ല. എന്നാൽ ആരാധകർക്ക് സീ5 (ZEE5) ആപ്പിലൂടെയും വെബ്‌സൈറ്റിലൂടെയും മത്സരം തത്സമയം കാണാൻ സാധിക്കും.