വെസ്റ്റിന്‍ഡീസിനെതിരായ സെഞ്ചുറിക്ക് പിന്നാലെ എം എസ് ധോണിയുടെ റെക്കോര്‍ഡിനൊപ്പമെത്തി കെ എല്‍ രാഹുല്‍

ന്യൂ ചണ്ഡീഗഡ്: വെസ്റ്റിൻഡീസിനെതിരായ മൂന്നാം ഏകദിനത്തിൽ തകർപ്പൻ സെഞ്ച്വറിയോടെ മുൻ ഇന്ത്യൻ നായകൻ എം.എസ്. ധോണിയുടെ അപൂർവ നേട്ടത്തിനൊപ്പമെത്തി കെ.എൽ. രാഹുൽ. ഇന്ത്യക്കായി ഏകദിനത്തിൽ അഞ്ചാം നമ്പറിൽ ഇറങ്ങി ഏറ്റവും കൂടുതൽ സെഞ്ച്വറികൾ നേടുന്ന താരങ്ങളുടെ പട്ടികയിലാണ് രാഹുൽ ധോണിക്കൊപ്പം രണ്ടാം സ്ഥാനം പങ്കിട്ടത്. അഞ്ചാം നമ്പറിൽ രാഹുലിന്റെ നാലാം ഏകദിന സെഞ്ച്വറിയാണിത്.

മുല്ലാൻപൂരിൽ നടന്ന പോരാട്ടത്തിൽ 87 പന്തിൽ പുറത്താകാതെ 129 റൺസാണ് താരം അടിച്ചുകൂട്ടിയത്. 10 ഫോറുകളും ആറ് കൂറ്റൻ സിക്സറുകളും അടങ്ങുന്നതായിരുന്നു രാഹുലിന്റെ ഇന്നിങ്സ്. ഏഴ് സെഞ്ച്വറികളോടെ മുൻ താരം യുവരാജ് സിങ്ങാണ് ഈ പട്ടികയിൽ ഒന്നാമതുള്ളത്.

അതേസമയം, അഞ്ചാം നമ്പറിലിറങ്ങി വെസ്റ്റിൻഡീസിനെതിരെ ഒരു ഇന്ത്യൻ താരം നേടുന്ന ഉയർന്ന വ്യക്തിഗത സ്കോറെന്ന യുവരാജിന്റെ റെക്കോർഡും (110 റൺസ്, 2005) രാഹുൽ മറികടന്നു.

തഞ്ചക്കത്തോടെയും പക്വതയോടെയും ക്രീസിൽ നിലയുറപ്പിച്ച രാഹുൽ, തുടക്കത്തിൽ സിംഗിളുകളിലൂടെ സ്കോർ ബോർഡ് ചലിപ്പിക്കാനാണ് ശ്രദ്ധിച്ചത്. 41 പന്തിൽ അർധസെഞ്ച്വറി പൂർത്തിയാക്കിയ ശേഷം താരം വിൻഡീസ് ബൗളർമാർക്കെതിരെ കടന്നാക്രമണം അഴിച്ചുവിട്ടു. തുടർന്ന് വെറും 39 പന്തിൽ നിന്നാണ് രാഹുൽ മൂന്നക്കം കടന്നത്.

മാത്യു ഫോർഡ്, ജെയ്ഡൻ സീൽസ്, കീമോ പോൾ എന്നിവരടങ്ങിയ വിൻഡീസ് ബൗളിങ് നിരയെ നിഷ്പ്രഭമാക്കിയ രാഹുലിന്റെ ബാറ്റിങ് മികവിൽ ഇന്ത്യ നിശ്ചിത ഓവറിൽ 351 റൺസെന്ന കൂറ്റൻ സ്കോർ പടുത്തുയർത്തി.