പ്രണവി ഉർസിന് ചരിത്ര നേട്ടം! ഏഷ്യൻ ഗെയിംസ് ഗോൾഫിൽ ഇന്ത്യയ്ക്ക് ആദ്യ സ്വർണം, ടീം ഇനത്തിൽ വെള്ളിയും!

ഐച്ചി-നഗോയ: ഏഷ്യൻ ഗെയിംസ് ഗോൾഫിൽ ചരിത്രത്താൾ തുന്നിച്ചേർത്ത് ഇന്ത്യൻ താരം പ്രണവി ഉർസ്. അന്താരാഷ്ട്ര തലത്തിൽ ഗോൾഫിൽ വ്യക്തിഗത സ്വർണം നേടുന്ന ആദ്യ ഇന്ത്യൻ വനിതയെന്ന അപൂർവ നേട്ടമാണ് ശനിയാഴ്ച പ്രണവി സ്വന്തമാക്കിയത്. കസുഗായി കൺട്രി ക്ലബ്ബിൽ നടന്ന വാശിറ്റേറിയ പോരാട്ടത്തിൽ മൈസൂരു സ്വദേശിയായ 23-കാരിയുടെ മിന്നുന്ന പ്രകടനത്തിന് പിന്നാലെ, ടീം ഇനത്തിൽ ഇന്ത്യ വെള്ളി മെഡലും കരസ്ഥമാക്കി. അദിതി അശോക്, ദിക്ഷ ദാഗർ എന്നിവരടങ്ങുന്നതായിരുന്നു ഇന്ത്യൻ സംഘം.

അവസാന ദിനം വ്യക്തിഗത ലീഡോടെയാണ് പ്രണവി ഇറങ്ങിയത്. ഫ്രണ്ട് നയനിൽ തുടക്കത്തിൽ നേരിട്ട ചെറിയ തിരിച്ചടി ലീഡിന് ഭീഷണിയായെങ്കിലും, ബാക്ക് നയനിൽ കാഴ്ചവെച്ച വൻ തിരിച്ചുവരവ് വിജയവഴിയിലെത്തിച്ചു. പാർ-ഫോർ 13-ആം ഹോളിൽ നേടിയ നിർണായക ബേർഡിയാണ് ഒന്നാം സ്ഥാനം തിരിച്ചുപിടിക്കാൻ തുണയായത്.

ചൈനയുടെ മുൻ ലോക ഒന്നാം നമ്പർ താരവും മേജർ ചാമ്പ്യനുമായയിൻ റൂവോണിംഗ്, സിംഗപ്പൂരിന്റെ ഷാനൻ താൻ എന്നിവരിൽ നിന്ന് ശക്തമായ വെല്ലുവിളിയാണ് പ്രണവി നേരിട്ടത്. എന്നാൽ അവസാന ഘട്ടങ്ങളിൽ പതറാതെ നിലയുറപ്പിച്ച താരം, നാല് റൗണ്ടുകളുള്ള ടൂർണമെന്റ് 15-അണ്ടർ പാറിൽ പൂർത്തിയാക്കിയാണ് ചരിത്രവിജയം കുറിച്ചത്.

2023-ലെ ഹാംഗ്‌ഷൂ ഏഷ്യൻ ഗെയിംസിൽ അദിതി അശോക് നേടിയ വെള്ളി മെഡലായിരുന്നു വനിതാ ഗോൾഫിൽ ഇന്ത്യയുടെ ഇതുവരെയുള്ള ഉയർന്ന നേട്ടം. ഈ റെക്കോർഡാണ് പ്രണവി തിരുത്തിക്കുറിച്ചത്. വ്യക്തിഗത നേട്ടത്തിന് പുറമെ ടീം മത്സരത്തിലും പ്രണവിയുടെ പ്രകടനം നിർണായകമായി. ചൈനയ്ക്ക് പിന്നിൽ രണ്ടാമതെത്തിയാണ് ഇന്ത്യൻ സംഘം വെള്ളി ഉറപ്പിച്ചത്.

ഒരൊറ്റ ദിനം കൊണ്ട് രണ്ട് മെഡലുകൾ സ്വന്തമാക്കിയ പ്രണവി ഉർസിന്റെ പ്രകടനം അന്താരാഷ്ട്ര തലത്തിൽ ഇന്ത്യൻ ഗോൾഫിന് പുതിയ പ്രതീക്ഷ നൽകുന്നതാണ്.