ഉക്രൈൻ ഡ്രോൺ ആക്രമണം: 23 ഇന്ത്യൻ ജീവനക്കാരുള്ള എണ്ണക്കപ്പലിന് തീപിടിച്ചു; ആക്രമണം ശക്തമാക്കുമെന്ന് ഇരു പക്ഷവും

മോസ്കോ: റഷ്യൻ കരിങ്കടൽ തീരത്ത് 23 ഇന്ത്യൻ ജീവനക്കാരുമായി സഞ്ചരിച്ച എണ്ണക്കപ്പലിന് നേരെ ഉക്രൈന്റെ ഡ്രോൺ ആക്രമണം. ആക്രമണത്തിൽ കപ്പലിന് വൻതോതിൽ തീപിടിച്ചു. ലിബീരിയൻ പതാക ഘടിപ്പിച്ച കപ്പലിനാണ് തീപിടിച്ചതെന്നും കപ്പലിലുണ്ടായിരുന്ന 23 ഇന്ത്യൻ ജീവനക്കാരെയും സുരക്ഷിതമായി രക്ഷപ്പെടുത്തിയതായും റഷ്യൻ ഗതാഗത മന്ത്രാലയം അറിയിച്ചു.

നാവിക ഡ്രോണുകൾ (Sea Drones) ഉപയോഗിച്ചാണ് കപ്പൽ ആക്രമിക്കപ്പെട്ടത്. വൻതോതിൽ തീ പടർന്നുപിടിച്ചതിനെ തുടർന്ന് അഗ്നിശമന സേനയ്ക്ക് നിലവിൽ തീ അണയ്ക്കാൻ സാധിച്ചിട്ടില്ല. കരിങ്കടലിൽ ചോർന്നൊലിച്ച ക്രൂഡ് ഓയിൽ കത്തിയമരുകയാണെന്നും തീയുടെ തീവ്രത കുറഞ്ഞ ശേഷമേ രക്ഷാപ്രവർത്തനം പൂർണ്ണതോതിലാക്കാനാകൂ എന്നും അധികൃതർ വ്യക്തമാക്കി.

പ്രശസ്ത റിസോർട്ട് നഗരമായ സോച്ചിക്ക് സമീപമാണ് സംഭവം. കടലിൽ നിന്ന് വൻതോതിൽ തീജ്വാലകളും കറുത്ത പുകയും ഉയരുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.

റൊമാനിയൻ തീരത്ത് മറ്റൊരു ധാന്യക്കപ്പലിന് നേരെ ആക്രമണമുണ്ടായി ഒരാൾ കൊല്ലപ്പെടുകയും ഒരാളെ കാണാതാവുകയും ചെയ്തതിന് തൊട്ടുപിറ്റേന്നാണ് പുതിയ സംഭവം. റൊമാനിയൻ തീരത്തുണ്ടായ ആക്രമണത്തിന് പിന്നിൽ റഷ്യയാണെന്ന് ഉക്രൈൻ ആരോപിച്ചിരുന്നു. ഇതിൽ ഒരു ഇന്ത്യൻ ജീവനക്കാരന് പരിക്കേറ്റിട്ടുമുണ്ട്.

തങ്ങളുടെ നഗരങ്ങൾക്ക് നേരെ റഷ്യ നടത്തുന്ന ശക്തമായ വ്യോമാക്രമണങ്ങൾക്കുള്ള ശക്തമായ തിരിച്ചടിയാണ് റഷ്യൻ എണ്ണ അടിസ്ഥാന സൗകര്യങ്ങൾക്ക് നേരെയുള്ള ആക്രമണമെന്ന് ഉക്രൈൻ വ്യക്തമാക്കി. അതേസമയം, വരും ദിവസങ്ങളിൽ ഇരുപക്ഷവും പരസ്പരം ആക്രമണം കടുപ്പിക്കുമെന്ന മുന്നറിയിപ്പും നൽകിയിട്ടുണ്ട്.