ജിയോഹോട്സ്റ്റാർ മിഡിൽ ഈസ്റ്റിലും നോർത്ത് ആഫ്രിക്കയിലും ലഭ്യമാകും

ഇന്ത്യയിലെ മുൻനിര സ്ട്രീമിങ് പ്ലാറ്റ്‌ഫോമായ ജിയോഹോട്ട്സ്റ്റാർ മിഡിൽ ഈസ്റ്റിലും നോർത്ത് ആഫ്രിക്കൻ രാജ്യങ്ങളിലും (MENA) സേവനം ആരംഭിക്കുന്നു. യുകെ, കാനഡ, സിംഗപ്പൂർ എന്നിവിടങ്ങളിലെ വിജയകരമായ തുടക്കത്തിന് ശേഷമാണ് പ്ലാറ്റ്‌ഫോം MENA മേഖലയിലേക്ക് പ്രവേശിക്കുന്നത്. പ്രമുഖ സ്ട്രീമിങ് സേവനദാതാക്കളായ സ്റ്റാർസ്പ്ലേയുമായി (STARZPLAY) സഹകരിച്ചാണ് ജിയോഹോട്ട്സ്റ്റാറിന്റെ ഉള്ളടക്കങ്ങൾ ഈ മേഖലയിൽ ലഭ്യമാക്കുക.

സ്റ്റാർസ്പ്ലേ ആപ്പിലൂടെയും വെബ്‌സൈറ്റിലൂടെയും ജിയോഹോട്ട്സ്റ്റാർ പ്രേക്ഷകരിലേക്ക് എത്തും. 10 ഭാഷകളിലെ ഓഡിയോ ട്രാക്കുകൾ, പ്രമുഖ ഒറിജിനൽ സീരീസുകൾ, ജനപ്രിയ ടെലിവിഷൻ പരിപാടികൾ, സിനിമകൾ എന്നിവ ലഭ്യമാകും. ബിഗ് ബോസിന്റെ ആറ് ഭാഷകളിലുള്ള സീസണുകളും കോഫി വിത്ത് കരണിന്റെ പുതിയ പതിപ്പും ഇതിൽ ഉൾപ്പെടുന്നു. പ്രവാസി മലയാളികളെ ലക്ഷ്യമിട്ട് മികച്ച മലയാളം കാറ്റലോഗും സജ്ജമാക്കിയിട്ടുണ്ട്.

പ്രതിമാസം 34.99 എ.ഇ.ഡി നിരക്കിലുള്ള സ്റ്റാർസ്പ്ലേയുടെ 'പ്ലസ് പ്ലാനി'ലൂടെ ജിയോഹോട്ട്സ്റ്റാറിന്റെ വിനോദ ശേഖരങ്ങൾ കാണാം. സ്പോർട്സും ജിയോഹോട്ട്സ്റ്റാർ വിനോദ പരിപാടികളും അടങ്ങുന്ന 'മാക്സ് പ്ലാനി'ന് 49.99 എ.ഇ.ഡിയാണ് പ്രതിമാസ വരിസംഖ്യ.

ലഭ്യമാകുന്ന പ്രധാന സേവനങ്ങളും വിവരങ്ങളും:

• സഹകരണം: സ്റ്റാർസ്പ്ലേയുമായി ചേർന്ന് എക്സ്ക്ലൂസീവ് സ്ട്രീമിങ്.

• ഉള്ളടക്കം: മലയാളം, ഹിന്ദി, തമിഴ്, തെലുങ്ക്, ബംഗാളി ഉൾപ്പെടെ 10 ഭാഷകളിലെ പരിപാടികൾ.

• പ്രത്യേകതകൾ: AI അധിഷ്ഠിത പേഴ്സണലൈസേഷൻ, ഇന്ററാക്ടീവ് വിനോദ രീതികൾ.

• വരിസംഖ്യ: പ്ലസ് പ്ലാൻ (34.99 AED/മാസം), മാക്സ് പ്ലാൻ (49.99 AED/മാസം).

ആഗോളതലത്തിൽ ഇന്ത്യൻ വിനോദ പരിപാടികൾക്ക് വൻ സ്വീകാര്യതയാണുള്ളതെന്നും വലിയ ദക്ഷിണേഷ്യൻ ജനവിഭാഗം വസിക്കുന്ന MENA മേഖല തങ്ങൾക്ക് നിർണായക വിപണിയാണെന്നും ജിയോഹോട്ട്സ്റ്റാർ ഇന്റർനാഷണൽ ബിസിനസ് മേധാവി അമിത് മൽഹോത്ര വ്യക്തമാക്കി. വൻതോതിൽ ഭിന്നിച്ചുനിൽക്കുന്ന വിപണിയിൽ പ്രേക്ഷകർക്ക് അനുയോജ്യമായ വിനോദങ്ങൾ ഒറ്റ പ്ലാറ്റ്‌ഫോമിൽ ലഭ്യമാക്കുകയാണ് ഇതിലൂടെ ലക്ഷ്യമിടുന്നതെന്ന് സ്റ്റാർസ്പ്ലേ സി.ഇ.ഒ മാസ് ഷെയ്ഖ് പറഞ്ഞു.

ജിസിസി വിപണിയിലേക്കുള്ള പ്രവേശനത്തിന്റെ ഭാഗമായി ലോകത്തിലെ ഏറ്റവും ഉയരം കൂടിയ കെട്ടിടമായ ബുർജ് ഖലീഫയിൽ പ്രത്യേക വെളിച്ചവും വർണങ്ങളും സമന്വയിപ്പിച്ചുള്ള പ്രദർശനവും സംഘടിപ്പിച്ചിരുന്നു.