റിയാദിൽ മിസൈലാക്രമണം നടത്താൻ ഉപയോഗിച്ച ബാലിസ്റ്റിക് ലോഞ്ചർ സഖ്യസേന തകർത്തു

റിയാദ്: സൗദി തലസ്ഥാനമായ റിയാദിന് നേരെ മിസൈലാക്രമണം നടത്താൻ ഉപയോഗിച്ച ബാലിസ്റ്റിക് റോക്കറ്റ് ലോഞ്ചർ അറബ് സഖ്യസേന തകർത്തു. യമൻ തലസ്ഥാനമായ സനാഅയിൽ വെച്ചാണ് സൈനിക നടപടിയിലൂടെ ലോഞ്ചർ തകർത്തതെന്ന് സഖ്യസേന വക്താവ് മേജർ ജനറൽ തുർക്കി അൽ മാലിക്കി അറിയിച്ചു. സൗദിക്ക് നേരെ മറ്റൊരു ആക്രമണത്തിന് പദ്ധതിയിടുന്നതിനിടെയാണ് സഖ്യസേനയുടെ മിന്നലാക്രമണം.

ഒക്ടോബർ 6, 7 തീയതികളിൽ അബ്ഹ, റിയാദ് കിങ് ഖാലിദ് അന്താരാഷ്ട്ര വിമാനത്താവളങ്ങൾക്ക് നേരെ ഭീകരാക്രമണമുണ്ടായതായി സൗദി സിവിൽ ഏവിയേഷൻ ജനറൽ അതോറിറ്റിയും സ്ഥിരീകരിച്ചു. ആക്രമണത്തെ തുടർന്ന് എമർജൻസി റെസ്പോൺസ് സംഘങ്ങളും സുരക്ഷാ ഏജൻസികളും അടിയന്തര സുരക്ഷാ പദ്ധതി പ്രകാരമുള്ള നടപടികൾ സ്വീകരിച്ചു.

അബ്ഹ അന്താരാഷ്ട്ര വിമാനത്താവളത്തിന് നേരെയുണ്ടായ ആക്രമണത്തിൽ മൊറോക്കൻ, അൾജീരിയൻ പൗരന്മാരായ രണ്ട് പ്രവാസി വനിതകൾ കൊല്ലപ്പെട്ടു. സ്വദേശികളും ബംഗ്ലാദേശ്, ഫിലിപ്പൈൻസ് സ്വദേശികളായ പ്രവാസികളും ഉൾപ്പെടെ 28 പേർക്ക് പരിക്കേറ്റു.

റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിലുണ്ടായ ആക്രമണത്തിൽ സുഡാൻ പൗരനാണ് കൊല്ലപ്പെട്ടത്. അഞ്ച് സൗദി പൗരന്മാർ, രണ്ട് ഈജിപ്ഷ്യൻ പ്രവാസികൾ, ഒരു പാകിസ്താൻ പൗരൻ എന്നിവരുൾപ്പെടെ എട്ട് പേർക്ക് പരിക്കേൽക്കുകയും ചെയ്തു. പരിക്കേറ്റ ചിലരുടെ നില ഗുരുതരമായി തുടരുകയാണ്.