'ഫോൺപേ'യുടെ അടുത്ത മൂവ്! 20,000 പേരെ നിയമിക്കും, 50 ലക്ഷം പേയ്മെന്‍റ് ഡിവൈസുകൾ വിന്യസിക്കും, വിപുലീകരണത്തിനൊരുങ്ങി കമ്പനി

​ന്യൂഡൽഹി: രാജ്യത്തെ ഗ്രാമീണ മേഖലകളിലേക്കും ചെറുപട്ടണങ്ങളിലേക്കും ഡിജിറ്റൽ പേയ്‌മെന്റ് ശൃംഖല വിപുലീകരിക്കാൻ വൻ പദ്ധതികളുമായി പ്രമുഖ ഫിൻടെക് കമ്പനിയായ ഫോൺപേ. വ്യാപാരി ശൃംഖല ശക്തിപ്പെടുത്തുന്നതിന്റെ ഭാഗമായി അടുത്ത ഒരു വർഷത്തിനുള്ളിൽ 20,000-ത്തിലധികം മുൻനിര വിൽപ്പന ജീവനക്കാരെ (Sales Executives) കമ്പനി നേരിട്ട് നിയമിക്കും.

​ഇതിനുപുറമെ, അടുത്ത 12 മാസത്തിനുള്ളിൽ 50 ലക്ഷത്തിലധികം പേയ്‌മെന്റ് ഉപകരണങ്ങൾ വിന്യസിക്കാനും കമ്പനി ലക്ഷ്യമിടുന്നു. സ്മാർട്ട് സ്പീക്കറുകൾ, പോയിന്റ് ഓഫ് സെയിൽ (POS) മെഷീനുകൾ എന്നിവ ഉൾപ്പെടുന്ന ഈ ശൃംഖലയുടെ 50 ശതമാനവും ടയർ-6 നഗരങ്ങളിലെയും ഗ്രാമീണ മേഖലകളിലെയും ചെറുകിട വ്യാപാരികളിലാണ് സ്ഥാപിക്കുക.

​തൊഴിലവസരം: 20,000-ത്തിലധികം പുതിയ നേരിട്ടുള്ള നിയമനങ്ങൾ.

​ഉപകരണങ്ങൾ: 50 ലക്ഷം പേയ്‌മെന്റ് ഡിവൈസുകൾ (പകുതിയും ഗ്രാമീണ മേഖലകളിൽ).

​സേവനങ്ങൾ: വ്യാപാരികളെ ഡിജിറ്റൽ സംവിധാനത്തിലേക്ക് മാറ്റൽ, KYC പൂർത്തിയാക്കൽ, ഉപകരണങ്ങളുടെ പരിപാലനം.

​പുതിയ MDR സംവിധാനവും തൊഴിൽ നിയമങ്ങളും സഹായകം

​അടുത്തിടെ നടപ്പിലാക്കിയ എം.ഡി.ആർ (Merchant Discount Rate) സംവിധാനവും തൊഴിൽ നിയമ പരിഷ്കരണങ്ങളുമാണ് വിപുലീകരണത്തിന് കരുത്തേകുന്നതെന്ന് ഫോൺപേ വ്യക്തമാക്കി. എം.ഡി.ആർ വഴി ലഭിക്കുന്ന തുകയുടെ അഞ്ച് ശതമാനം ഉപയോഗിച്ച് പ്രത്യേക ഫണ്ട് രൂപീകരിച്ച് ഗ്രാമീണ മേഖലകളിലെ ഡിജിറ്റൽ സാക്ഷരതയും അടിസ്ഥാന സൗകര്യങ്ങളും വർധിപ്പിക്കാനാണ് നീക്കം.

​പുതിയ തൊഴിൽ നിയമങ്ങൾ നടപടിക്രമങ്ങൾ ലളിതമാക്കിയതോടെ വലിയൊരു തൊഴിൽ ശക്തിയെ വേഗത്തിൽ കമ്പനിയുടെ ഭാഗമാക്കാൻ സാധിക്കുമെന്ന് അധികൃതർ അറിയിച്ചു.

​ചെറുകിട വ്യാപാരികൾക്ക് വായ്പാ സൗകര്യങ്ങൾ എളുപ്പമാകും

​സെയിൽസ് ജീവനക്കാർ വഴി ഗ്രാമീണ വ്യാപാരികളെ നേരിട്ട് കണ്ട് കൃത്യമായ കെ.വൈ.സി (KYC) പൂർത്തിയാക്കി പേയ്‌മെന്റ് ഉപകരണങ്ങൾ നൽകാനാണ് പദ്ധതി. ഡിജിറ്റൽ ഇടപാടുകൾ സുതാര്യമാകുന്നതോടെ ചെറുകിട വ്യാപാരികൾക്ക് ബാങ്കുകളിൽ നിന്നും മറ്റ് സാമ്പത്തിക സ്ഥാപനങ്ങളിൽ നിന്നും വായ്പകൾ എളുപ്പത്തിൽ ലഭ്യമാക്കാൻ ഇത് സഹായിക്കുമെന്നും ഫോൺപേ വ്യക്തമാക്കുന്നു.