കടുത്ത നടപടിയുമായി കേന്ദ്രസർക്കാർ; ഒക്ടോബർ 15 മുതൽ നവംബർ 30 വരെ നിയന്ത്രണം; സൂക്ഷിക്കാവുന്ന പഞ്ചസാരയുടെ അളവ് 1000 ക്വിൻ്റലാക്കി

ന്യൂഡൽഹി: വരാനിരിക്കുന്ന ഉത്സവ സീസണിൽ പഞ്ചസാരയുടെ ലഭ്യത ഉറപ്പാക്കാനും വിലക്കയറ്റവും പൂഴ്ത്തിവെപ്പും തടയാനുമായി കർശന നിയന്ത്രണങ്ങളുമായി കേന്ദ്ര സർക്കാർ. വ്യാപാരികളും ഡീലർമാരും പഞ്ചസാര സ്റ്റോക്ക് സൂക്ഷിക്കുന്നതിനുള്ള സമയപരിധിയും കൈവശം വെക്കാവുന്ന പരമാവധി അളവും വെട്ടിക്കുറച്ചു. ഒക്ടോബർ 15 മുതൽ നവംബർ 30 വരെയാണ് പുതിയ നിയന്ത്രണങ്ങൾ പ്രാബല്യത്തിലുണ്ടാവുക.

പുതിയ ഉത്തരവ് പ്രകാരം, ഡീലർമാർക്ക് സ്റ്റോക്ക് ലഭിക്കുന്ന തീയതി മുതൽ പരമാവധി 15 ദിവസം മാത്രമേ പഞ്ചസാര കൈവശം വെക്കാൻ അനുവാദമുണ്ടാകൂ. നേരത്തെ ഇത് 30 ദിവസമായിരുന്നു. കൂടാതെ കൈവശം വെക്കാവുന്ന പഞ്ചസാരയുടെ പരമാവധി അളവ് 1,000 ക്വിന്റലായി പരിമിതപ്പെടുത്തുകയും ചെയ്തതായി ഉപഭോക്തൃ കാര്യ, ഭക്ഷ്യ-പൊതുവിതരണ മന്ത്രാലയം അറിയിച്ചു.

അതേസമയം, ഗതാഗത തടസ്സങ്ങളും കിഴക്കൻ-വടക്കുകിഴക്കൻ സംസ്ഥാനങ്ങളിലേക്കുള്ള പ്രധാന വിതരണ കേന്ദ്രങ്ങൾ എന്ന നിലയും പരിഗണിച്ച് കൊൽക്കത്ത, സമീപ മെട്രോപൊളിറ്റൻ മേഖലകൾ, അസം എന്നിവിടങ്ങളിൽ സ്റ്റോക്ക് പരിധി 2,000 ക്വിന്റലായി ഇളവ് നൽകിയിട്ടുണ്ട്.

മില്ലുകളിൽനിന്ന് വിതരണ ശൃംഖല വഴി ഉപഭോക്താക്കളിലേക്ക് പഞ്ചസാര തടസ്സമില്ലാതെ എത്തുന്നുണ്ടെന്ന് ഉറപ്പാക്കുകയാണ് നടപടിയുടെ ലക്ഷ്യം. ഓഗസ്റ്റിലെ ഉയർന്ന നിരക്കുമായി താരതമ്യം ചെയ്യുമ്പോൾ പഞ്ചസാരയുടെ ചില്ലറ വിൽപ്പന വിലയിൽ 15 ശതമാനവും എക്സ്-മില്ല് വിലയിൽ 28 ശതമാനവും കുറവുണ്ടായിട്ടുണ്ട്. ഇതിന്റെ ആനുകൂല്യം ഉപഭോക്താക്കൾക്ക് ലഭ്യമാക്കാൻ മൊത്ത-ചില്ലറ വ്യാപാരികളോട് സർക്കാർ ആവശ്യപ്പെട്ടു.

ഗണപതി പൂജ, ദസറ, ദീപാവലി ആഘോഷങ്ങളുടെ പശ്ചാത്തലത്തിൽ പഞ്ചസാര ഉപഭോഗം കുത്തനെ ഉയരുന്ന സാഹചര്യത്തിലാണ് വിപണിയിലെ ഇടപെടൽ. മുൻകരുതലിന്റെ ഭാഗമായി മെയ് മാസത്തിൽ പഞ്ചസാര കയറ്റുമതി നിരോധിച്ചിരുന്ന സർക്കാർ, ഓഗസ്റ്റിൽ 10 ലക്ഷം ടൺ റോ പഞ്ചസാര പൂജ്യം ശതമാനം തീരുവയിൽ ഇറക്കുമതി ചെയ്യാനും അനുമതി നൽകിയിരുന്നു. ഒക്ടോബർ ഒന്നിന് ആരംഭിച്ച പുതിയ കരിമ്പ് അരപ്പ് സീസണിൽ (2026-27) കരിമ്പിന്റെ ന്യായവും ലാഭകരവുമായ വില (FRP) ക്വിന്റലിന് 365 രൂപയായും നിശ്ചയിച്ചിട്ടുണ്ട്.