ഹെലികോപ്റ്ററിൽ നിന്ന് താഴേക്ക് എറിഞ്ഞ ദുരിതാശ്വാസ സാമഗ്രികൾ തലയിൽ വീണ് 60-കാരൻ മരിച്ചു; സംഭവം ബിഹാറിൽ
Nazeema
സ്റ്റാഫ് റിപ്പോർട്ടർ
ബിഹാറിലെ സാരൺ ജില്ലയിൽ ഹെലികോപ്റ്ററിൽ നിന്ന് താഴേക്ക് എറിഞ്ഞ ദുരിതാശ്വാസ പാക്കറ്റ് തലയിൽ വീണ് 60-കാരനായ ലക്ഷ്മൺ യാദവ് മരിച്ചു. മതിയായ സുരക്ഷാ മുന്നറിയിപ്പുകളില്ലാതെ ഭാരമേറിയ പാക്കറ്റുകൾ എറിഞ്ഞതാണ് അപകടത്തിന് കാരണമായതെന്ന് നാട്ടുകാർ ആരോപിച്ചു.
സാരൺ: ബിഹാറിലെ സാരൺ ജില്ലയിൽ വെള്ളപ്പൊക്ക ദുരിതാശ്വാസ സാമഗ്രികൾ അടങ്ങിയ പാക്കറ്റ് തലയിൽ വീണ് വയോധികൻ മരിച്ചു. സാരൺ സ്വദേശിയായ ലക്ഷ്മൺ യാദവ് (60) ആണ് മരിച്ചത്.
വെള്ളപ്പൊക്കത്തിൽ ഒറ്റപ്പെട്ടുപോയ പ്രദേശങ്ങളിൽ ജില്ലാ ഭരണകൂടത്തിന്റെ നേതൃത്വത്തിൽ ഹെലികോപ്റ്റർ മാർഗം ദുരിതാശ്വാസ വിതരണം നടത്തുന്നതിനിടെയാണ് അപകടം. വീടിന് വെളിയിൽ നിൽക്കുകയായിരുന്ന ലക്ഷ്മൺ യാദവിന്റെ തലയിലേക്ക് ഹെലികോപ്റ്ററിൽ നിന്ന് താഴേക്ക് എറിഞ്ഞ കനത്ത ഭാരമുള്ള ഭക്ഷണപ്പാക്കറ്റ് നേരിട്ട് പതിക്കുകയായിരുന്നു.
തലയ്ക്ക് ഗുരുതരമായി പരിക്കേറ്റ അദ്ദേഹത്തെ ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആളുകൾ തിങ്ങിപ്പാർക്കുന്ന പ്രദേശങ്ങളിൽ മതിയായ സുരക്ഷാ മുന്നറിയിപ്പുകളില്ലാതെ ഭാരമേറിയ പാക്കറ്റുകൾ എറിഞ്ഞു നൽകിയതാണ് അപകടത്തിന് കാരണമായതെന്ന് പ്രദേശവാസികൾ ആരോപിച്ചു.
സംഭവത്തെ തുടർന്ന് പരേതന്റെ കുടുംബത്തിന് സംസ്ഥാന സർക്കാർ അടിയന്തര സാമ്പത്തിക സഹായം പ്രഖ്യാപിച്ചിട്ടുണ്ട്.
