ടോൾ അടയ്ക്കേണ്ട, ഫാസ്ടാഗ് നിയമങ്ങളിൽ നിർണായക മാറ്റം; ഇളവ് ലഭിക്കുന്നവർ അറിയണം ഈ മാറ്റം
Nazeema
സ്റ്റാഫ് റിപ്പോർട്ടർ
കേന്ദ്ര റോഡ് ഗതാഗത മന്ത്രാലയം വികലാംഗരുടെ ഡിസ്‌കൗണ്ട് ഫാസ്ടാഗ് കാലാവധി വൈകല്യത്തിന്റെ ശതമാനമനുസരിച്ച് 3 മുതൽ 5 വർഷം വരെയായി നീട്ടി. ഇതോടെ ഓരോ വർഷവും രേഖകൾ സമർപ്പിച്ച് ഫാസ്ടാഗ് പുതുക്കേണ്ട ബുദ്ധിമുട്ട് ഒഴിവാകും.
ന്യൂഡൽഹി: രാജ്യത്തെ ഹൈവേകളിലും എക്‌സ്പ്രസ് വേകളിലും വികലാംഗർക്ക് അനുവദിക്കുന്ന ഡിസ്‌കൗണ്ട് ഫാസ്‌ടാഗുകളുടെ കാലാവധി സംബന്ധിച്ച് നിർണായക തിരുമാനവുമായി കേന്ദ്ര റോഡ് ഗതാഗത-ഹൈവേ മന്ത്രാലയം. ഇനി മുതൽ വൈകല്യത്തിന്റെ ശതമാനത്തിന് അനുസൃതമായി 3 മുതൽ 5 വർഷം വരെ ഫാസ്‌ടാഗുകൾക്ക് സാധുത ലഭിക്കും. നിലവിൽ ഓരോ വർഷവും രേഖകൾ സമർപ്പിച്ച് ഫാസ്ടാഗ് പുതുക്കേണ്ടിയിരുന്ന ബുദ്ധിമുട്ടാണ് ഇതോടെ ഒഴിവാകുന്നത്.
പുതിയ വ്യവസ്ഥകൾ ഇന്ന് മുതൽ പ്രാബല്യത്തിൽ വന്നു. വികലാംഗർക്ക് ടോൾ പ്ലാസകൾ വഴി തടസ്സമില്ലാതെ യാത്രാസൗകര്യമൊരുക്കുന്നതിനാണ് പുതിയ ഇളവുകൾ പ്രഖ്യാപിച്ചിരിക്കുന്നത്.
കാലാവധി നിശ്ചയിക്കുന്നത് വൈകല്യ ശതമാനം കണക്കാക്കി
പുതിയ ഉത്തരവ് പ്രകാരം, വൈകല്യത്തിന്റെ തോത് അനുസരിച്ചായിരിക്കും ഫാസ്‌ടാഗിന്റെ കാലാവധി നിശ്ചയിക്കുക:
70% മുതൽ 100% വരെ വൈകല്യമുള്ളവർക്ക്: 5 വർഷത്തെ സാധുത ലഭിക്കും.
40% മുതൽ 70% വരെ വൈകല്യമുള്ളവർക്ക്: 3 വർഷത്തെ സാധുത ലഭിക്കും.
ഇതോടെ 3 അല്ലെങ്കിൽ 5 വർഷത്തെ കാലാവധി പൂർത്തിയാകുമ്പോൾ മാത്രം ആവശ്യമായ രേഖകൾ സഹിതം ഓൺലൈനായോ ഓഫ്‌ലൈനായോ അപേക്ഷ നൽകിയാൽ മതിയെന്ന് മന്ത്രാലയം വ്യക്തമാക്കി.
അപേക്ഷിക്കാനുള്ള യോഗ്യതകളും നിബന്ധനകളും
ടോൾ ഇളവ ലഭിക്കുന്ന ഡിസ്‌കൗണ്ട് ഫാസ്‌ടാഗുകൾ ദുരുപയോഗം ചെയ്യുന്നത് തടയാൻ കർശന നിബന്ധനകളും വ്യവസ്ഥ ചെയ്തിട്ടുണ്ട്:
രേഖകൾ: അപേക്ഷകർക്ക് സർക്കാർ അംഗീകൃത വൈകല്യ സർട്ടിഫിക്കറ്റും (UDID കാർഡ്) വാഹനം സംബന്ധിച്ച രേഖകളും ഉണ്ടായിരിക്കണം.
ഉടമസ്ഥത: വാഹനം വികലാംഗരായ വ്യക്തിയുടെ പേരിൽ രജിസ്റ്റർ ചെയ്തതോ, അല്ലെങ്കിൽ അവരുടെ ഉപയോഗത്തിനായി പ്രത്യേകം രജിസ്റ്റർ ചെയ്തതോ ആയിരിക്കണം.
ദുരുപയോഗത്തിനെതിരെ നടപടി: ഈ സൗകര്യം അനർഹർ ദുരുപയോഗം ചെയ്യുന്നതായി കണ്ടെത്തിയാൽ അത്തരം ഫാസ്‌ടാഗുകൾ ഉടനടി കരിമ്പട്ടികയിൽ പെടുത്തുകയും നിയമനടപടി സ്വീകരിക്കുകയും ചെയ്യും.
ഡിജിറ്റൽ പരിശോധനയും വേഗത്തിലാകും
പുതിയ സംവിധാനത്തിലൂടെ ടോൾ പ്ലാസകളിലെ ഡിജിറ്റൽ പരിശോധന കൂടുതൽ വേഗത്തിലാക്കാനും വ്യാജ രേഖകൾ ഉപയോഗിച്ചുള്ള തട്ടിപ്പുകൾ തടയാനും സാധിക്കുമെന്ന് എൻ.എച്ച്.എ.ഐ (NHAI) അറിയിച്ചു. അർഹരായവർക്ക് എൻ.എച്ച്.എ.ഐയുടെയോ കേന്ദ്ര മന്ത്രാലയത്തിന്റെയോ ഔദ്യോഗിക സൗജന്യ ഫാസ്ടാഗ് പോർട്ടൽ വഴി യു.ഡി.ഐ.ഡി (UDID) കാർഡും വാഹന രേഖകളും സമർപ്പിച്ച് ദീർഘകാല സാധുതയുള്ള ഫാസ്‌ടാഗിനായി അപേക്ഷിക്കാവുന്നതാണ്.
