പത്തനംതിട്ട, ഇടുക്കി വിശാല ജില്ല കമ്മിറ്റി യോഗങ്ങളിൽ സിപിഎം നേതൃത്വത്തിന് രൂക്ഷവിമർശനം

പത്തനംതിട്ട: ഇടുക്കി വിശാല ജില്ലാ കമ്മിറ്റി യോഗങ്ങളിൽ സിപിഎം നേതൃത്വത്തിനെതിരെ പ്രതിനിധികളുടെ കടുത്ത വിമർശനം. രണ്ടാം പിണറായി സർക്കാർ സാധാരണക്കാരെ മറന്നുവെന്നും പാർട്ടിയിൽ ഇരട്ടനീതിയാണ് നടപ്പാക്കുന്നതെന്നും യോഗത്തിൽ വിമർശനമുയർന്നു. കോടിയേരി ബാലകൃഷ്ണന്റെ മകനും മുഖ്യമന്ത്രി പിണറായി വിജയന്റെ മകൾക്കുമെതിരായ ആരോപണങ്ങളിൽ പാർട്ടി രണ്ടുനിലപാടാണ് സ്വീകരിച്ചതെന്ന് പ്രതിനിധികൾ ചൂണ്ടിക്കാട്ടി.

ഇടുക്കിയിൽ മുതിർന്ന നേതാവ് എം.എം. മണിക്ക് നിയമസഭാ സീറ്റ് നിഷേധിച്ചത് പാർട്ടിക്ക് തിരിച്ചടിയായെന്ന് ആരോപണമുയർന്നു. ജില്ലാ സെക്രട്ടറിക്ക് ക്വാറി മാഫിയയുമായി വഴിവിട്ട ബന്ധമുണ്ടെന്ന ഗുരുതര ആരോപണവും ഇടുക്കിയിലെ യോഗത്തിൽ ഉയർന്നു വന്നു.

പിണറായി വിജയന്റെ പ്രസംഗശൈലിയും യോഗത്തിൽ ചോദ്യം ചെയ്യപ്പെട്ടു. വാർത്താസമ്മേളനത്തിലും പ്രസംഗങ്ങളിലും ചോദ്യം ചോദിക്കുന്നവരോട് 'വീട്ടിൽ പോയി ചോദിക്കാൻ' പറഞ്ഞ് ആക്ഷേപിക്കുന്നത് ജനങ്ങൾക്കിടയിൽ പാർട്ടിക്ക് വലിയ തിരിച്ചടിയുണ്ടാക്കിയെന്ന് പ്രതിനിധികൾ കുറ്റപ്പെടുത്തി.