സ്മിത് മച്ചാറിനെ സന്ദർശിച്ച് ശൈഖ് ഹംദാൻ; ക്യാപ്റ്റന്‍റെ ധൈര്യത്തെയും ഉത്തരവാദിത്തത്തെയും പ്രശംസിച്ച് ദുബായ് കിരീടാവകാശി

ദുബായ്: ഫ്ലൈ ദുബായ് വിമാനത്തിൽ സഹപൈലറ്റിന്റെ ആക്രമണത്തെ ധീരമായി ചെറുത്തുതോൽപ്പിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിനെ സന്ദർശിച്ച് ദുബായ് കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. വിമാനത്തിലെ യാത്രക്കാരുടെ ജീവൻ സംരക്ഷിക്കാൻ സ്മിത് കാണിച്ച ഉന്നതമായ ധൈര്യത്തെയും ഉത്തരവാദിത്തബോധത്തെയും ശൈഖ് ഹംദാൻ പ്രശംസിച്ചു. സ്മിത് മച്ചാറിന് സ്നേഹചുംബനം നൽകുന്ന ചിത്രം അദ്ദേഹം സാമൂഹിക മാധ്യമങ്ങളിൽ പങ്കുവെച്ചിട്ടുണ്ട്.

സ്മിത് യു.എ.ഇ നിലകൊള്ളുന്ന മൂല്യങ്ങളുടെ പ്രതീകമാണെന്നും രാജ്യത്തിന്റെ ചരിത്രത്തിന്റെ ഭാഗമാണെന്നും ശൈഖ് ഹംദാൻ കുറിച്ചു. "താനും യു.എ.ഇ ഭരണ നേതൃത്വവും അദ്ദേഹത്തിന്റെ സേവനത്തിൽ അഭിമാനിക്കുന്നു. യു.എ.ഇ സ്നേഹത്തിന്റെ രാജ്യമാണ്, സ്മിത് ഞങ്ങളുടെ ടീമിന്റെ ഭാഗമായതിൽ ഏറെ സന്തോഷമുണ്ട്," - ശൈഖ് ഹംദാൻ പറഞ്ഞു. ദുബായ് സിവിൽ ഏവിയേഷൻ പ്രസിഡന്റും എമിറേറ്റ്സ് ഗ്രൂപ്പ് ചെയർമാനുമായ ശൈഖ് അഹ്മദ് ബിൻ സയീദ് അൽ മക്തൂമും അദ്ദേഹത്തോടൊപ്പമുണ്ടായിരുന്നു.

സെപ്റ്റംബർ 30-നാണ് ദുബായിൽ നിന്ന് ടെൽ അവീവിലേക്ക് പുറപ്പെട്ട എഫ്.ഇസെഡ് 1073 (FZ 1073) വിമാനത്തിന്റെ കോക്ക്പിറ്റിൽ സഹപൈലറ്റ് അക്രമത്തിന് മുതിർന്നത്. തുടര്‍ന്ന് മറ്റ് ക്രൂ അംഗങ്ങളുടെ സഹായത്തോടെ സാഹചര്യം നിയന്ത്രണവിധേയമാക്കുകയും വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കുകയുമായിരുന്നു. യാത്രക്കാരും ജീവനക്കാരും പൂർണ സുരക്ഷിതരാണെന്ന് കമ്പനി വ്യക്തമാക്കി.

സ്മിത് മച്ചാറിന്റെ സമയോചിതമായ ഇടപെടലിനെ ലോക നേതാക്കളടക്കം അഭിനന്ദിച്ചു. സ്മിത് 'യഥാർത്ഥ ഹീറോ'യാണെന്ന് യു.എസ് മുൻ പ്രസിഡന്റ് ഡൊണാൾഡ് ട്രംപും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും പ്രതികരിച്ചു. ക്യാപ്റ്റൻ മച്ചാറിന്റെ ധീരതയിൽ ഇന്ത്യ അഭിമാനിക്കുന്നുവെന്ന് ഇന്ത്യൻ പ്രധാനമന്ത്രി നരേന്ദ്ര മോദിയും വ്യക്തമാക്കി.