'അതെല്ലാം കെട്ടുകഥ, താൻ ഒരു വാഗ്ദാനവും നൽകിയിട്ടില്ല'; ഇറാന് ഇളവുകൾ നൽകുമെന്ന റിപ്പോർട്ട് തള്ളി ട്രംപ്; ചർച്ച തുടരുന്നുവെന്ന് ഇറാൻ

​വാഷിങ്ടൺ: ആണവ വിഷയത്തിൽ വിട്ടുവീഴ്ചക്ക് തയ്യാറായാൽ ഇറാന് മേലുള്ള ഉപരോധങ്ങളിൽ ഇളവ് നൽകുമെന്ന വാർത്തകൾ തള്ളി മുൻ യു.എസ് പ്രസിഡന്റ് ഡോണാൾഡ് ട്രംപ്. വിഷയത്തിൽ താൻ യാതൊരുവിധ വാഗ്ദാനങ്ങളും നൽകിയിട്ടില്ലെന്നും വാർത്തകൾ പൂർണമായും കെട്ടുകഥയാണെന്നും ട്രംപ് വ്യക്തമാക്കി. അമേരിക്കൻ മാധ്യമമായ 'ആക്സിയോസ്' പുറത്തുവിട്ട റിപ്പോർട്ട് ഉടനടി പിൻവലിക്കണമെന്നും അദ്ദേഹം ആവശ്യപ്പെട്ടു.

​ആണവ ധാരണയിലെത്തിയാൽ ഇറാന് എതിരായ ഉപരോധങ്ങളിൽ ഇളവ് വരുത്തുമെന്നും മരവിപ്പിച്ച ഫണ്ടുകൾ വിട്ടുനൽകാൻ അമേരിക്ക സന്നദ്ധത അറിയിച്ചെന്നുമായിരുന്നു ആക്സിയോസിന്റെ റിപ്പോർട്ട്. എന്നാൽ ഇത് തികച്ചും അസത്യമാണെന്ന് ട്രംപ് സോഷ്യൽ മീഡിയയിലൂടെ പ്രതികരിച്ചു.

​"ഇറാന് ഉപരോധ ഇളവുകളും ഫണ്ടുകളും വാഗ്ദാനം ചെയ്തുവെന്ന ആക്സിയോസിന്റെ വാർത്ത അസത്യമാണ്. ഞാൻ അവർക്ക് ഒരു വാഗ്ദാനവും നൽകിയിട്ടില്ല. മറ്റ് വ്യാജ വാർത്തകളെപ്പോലെ ഇതും ഒരു നിർമ്മിതി മാത്രമാണ്. അവരുടെ ‘ട്രംപ് ഡിറേഞ്ച്മെന്റ് സിൻഡ്രോം’ തൃപ്തിപ്പെടുത്താനാണ് ഇത്തരം വാർത്തകൾ നൽകുന്നത്. ഈ റിപ്പോർട്ട് അവർ ഉടനടി പിൻവലിക്കണം," - ട്രംപ് വ്യക്തമാക്കി.

​അതേസമയം, യു.എസും ഇറാനും തമ്മിൽ ഏഴ് മാസമായി തുടരുന്ന നയതന്ത്ര സംഘർഷങ്ങൾക്ക് പരിഹാരം കാണാനുള്ള നീക്കങ്ങൾ സജീവമാണ്. ഖത്തറിന്റെയും പാകിസ്ഥാന്റെയും മധ്യസ്ഥതയിൽ സമാധാന കരാറിനായുള്ള ചർച്ചകൾ പുരോഗമിക്കുകയാണെന്ന് ഇറാൻ വൃത്തങ്ങൾ അറിയിച്ചു. സംഘർഷം അവസാനിപ്പിക്കുന്നത് ലക്ഷ്യമിട്ട് കഴിഞ്ഞ ദിവസങ്ങളിൽ ഇരു രാജ്യങ്ങളുടെയും പ്രതിനിധികൾ മധ്യസ്ഥരുമായി വെവ്വേറെ കൂടിക്കാഴ്ച നടത്തിയിരുന്നു.