2 കോടി മുതൽമുടക്കിൽ 411 കോടി ആഗോള കളക്ഷൻ; ബോക്സ് ഓഫീസിൽ തരംഗമായി 'ഹനുമാൻ അൻഷ്'

2 കോടി ബജറ്റ്, 411 കോടി കളക്ഷൻ; ബോക്സ് ഓഫീസിൽ കൊടുങ്കാറ്റായി 'ഹനുമാൻ അൻഷ്'

ന്യൂഡൽഹി: വെറും രണ്ടു കോടി രൂപ മുതൽമുടക്കിൽ നിർമ്മിച്ച് ആഗോള ബോക്സ് ഓഫീസിൽ 411 കോടി രൂപ കളക്ഷൻ നേടി കൊടുങ്കാറ്റായി മാറിയിരിക്കുകയാണ് 'ഹനുമാൻ അൻഷ്' എന്ന ഭക്തിനിർഭര ചിത്രം. റിലീസ് ചെയ്ത് 51 ദിവസത്തിനുള്ളിലാണ് ചിത്രം ഈ വമ്പൻ നേട്ടം കൊയ്തത്. വിശാൽ ചതുർവേദി രചനയും സംവിധാനവും നിർമ്മാണവും നിർവ്വഹിച്ച ചിത്രത്തിന് നിരൂപകരിൽ നിന്നും പ്രേക്ഷകരിൽ നിന്നും ഒരുപോലെ മികച്ച പ്രതികരണമാണ് ലഭിക്കുന്നത്.

പ്രസിദ്ധ ഹനുമാൻ ഭക്തനും ഹിന്ദു ഗുരുവുമായ നീം കരോലി ബാബയുടെ ജീവിതത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. ഓഗസ്റ്റ് ഏഴിന് തിയേറ്ററുകളിലെത്തിയ ചിത്രം പ്രാരംഭ ദിനങ്ങളിൽ ശാന്തമായ തുടക്കത്തിനു ശേഷം പോസിറ്റീവ് മൗത്ത് പബ്ലിസിറ്റിയിലൂടെ ബോക്സ് ഓഫീസിൽ 'സ്ലീപ്പർ ഹിറ്റ്' ആയി മാറുകയായിരുന്നു.

ഓഗസ്റ്റ് ഏഴിന് റിലീസ് ദിനത്തിൽ 10 ലക്ഷം രൂപയുടെ തുടക്കം ലഭിച്ച ചിത്രം, ആദ്യ ദിനം ആകെ 1.08 കോടി രൂപയാണ് നേടിയതെന്ന് സിനിമാ ട്രാക്കിങ് വെബ്സൈറ്റായ സാക്നിൽക് വ്യക്തമാക്കുന്നു. ഒരു മാസം പിന്നിട്ടപ്പോൾ ഇന്ത്യയിൽ നിന്നു മാത്രം 61 കോടി രൂപയുടെ നെറ്റ് കളക്ഷൻ നേടി.

നീം കരോലി ബാബയെക്കുറിച്ച് വിശാൽ ചതുർവേദി തന്നെ രചിച്ച 'ഡിവൈൻ ഡിടൂർ: ദാറ്റ് ചേഞ്ച്ഡ് മൈ ലൈഫ്' എന്ന പുസ്തകത്തെ ആസ്പദമാക്കിയാണ് ചിത്രം നിർമ്മിച്ചിരിക്കുന്നത്. ചിത്രത്തിൽ നീം കരോലി ബാബയായി വേഷമിട്ടിരിക്കുന്നത് ഷോഭിനവ് സത്യയാണ്.

ചന്ദൻ കെ. ആനന്ദ്, അനിൽ രസ്തോഗി, നിഖിൽ ദുബൈ, ഭഗ്‍വൻ ദാസ് പട്ടേൽ, നേഗ പരഞ്ജ്പേ, ഉദയ്സിംഗ് രാജ്പുത്, പൂർണിമ തിവാരി, ഗൗതം ത്രിപാഠി, ഗുൽഷൻ പാണ്ഡേ, രാജീവ് മിശ്ര, റിഷികേഷ് ദുബേ, വിഹാൻ ഷെഡ്ഗേ, സാദ്വിക് ശർമ്മ, അലക്സി ഡാനിറോവ്, സന്തോഷ് ദീക്ഷിത്, ബ്രിജ്പാൽ സിംഗ്, യാഷ് പാണ്ഡേ, അമൻ മെഹ്ത, രാജ്നീഷ്‍ ശ്രീവാസ്തവ, അഭിഷേക് മിശ്ര തുടങ്ങിയ വൻ താരനിരയും ചിത്രത്തിൽ അണിനിരക്കുന്നുണ്ട്.

സ്വംഭൂ മീഡിയ നെറ്റ്‌വർക്കും ഹോളി കൗ ഹോം പ്രൊഡക്ഷൻസും ചേർന്ന് നിർമ്മിച്ച ചിത്രത്തിന്റെ ഛായാഗ്രഹണം വിശാൽ ബാവയും എഡിറ്റിംഗ് ഷംഖ് രജധ്യാക്ഷയുമാണ് നിർവ്വഹിച്ചിരിക്കുന്നത്.