ഏഴ് കടൽ ഏഴ് മലൈയുടെ ഓപ്പണിംഗ് കളക്ഷൻ കണക്കുകള്‍

നിവിൻ പോളിയെ നായകനാക്കി റാം സംവിധാനം ചെയ്ത തമിഴ് ചിത്രം 'ഏഴ് കടൽ ഏഴ് മലൈ' ബോക്‌സ് ഓഫീസിൽ മന്ദഗതിയിലുള്ള തുടക്കം. നീണ്ട കാത്തിരിപ്പുകൾക്കൊടുവിൽ ഒക്ടോബർ ഒന്നിന് തിയറ്ററുകളിലെത്തിയ ചിത്രത്തിന് ആദ്യദിനം ഇന്ത്യയിൽ നിന്ന് 60.63 ലക്ഷം രൂപ മാത്രമാണ് നേടാനായതെന്ന് ട്രാക്ക് ടോളിവുഡ് റിപ്പോർട്ട് ചെയ്യുന്നു.

സുരേഷ് കാമാച്ചിയുടെ വി ഹൗസ് പ്രൊഡക്ഷൻ നിർമ്മിച്ച ചിത്രത്തിൽ അഞ്ചലി, സൂരി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. യുവൻ ശങ്കർ രാജയാണ് സംഗീത സംവിധാനം. നിർമ്മാണം പൂർത്തിയായി രണ്ടര വർഷത്തോളം വൈകിയാണ് ചിത്രം തിയറ്ററുകളിലെത്തിയത്. 2024 ലെ റോട്ടർഡാം അന്താരാഷ്ട്ര ചലച്ചിത്രോത്സവത്തിൽ 'ബിഗ് സ്ക്രീൻ കോമ്പറ്റീഷൻ' വിഭാഗത്തിൽ പ്രീമിയർ ചെയ്ത ചിത്രം, 46-ാമത് മോസ്കോ ഇന്റർനാഷണൽ ഫിലിം ഫെസ്റ്റിവലിൽ 'ബ്ലോക്ക്ബസ്റ്റേഴ്സ് ഫ്രം എറൗണ്ട് ദ വേൾഡ്' കാറ്റഗറിയിലേക്കും തിരഞ്ഞെടുക്കപ്പെട്ടിരുന്നു.

'പേരൻപ്', 'തങ്കമീൻകൾ', 'കട്രത് തമിഴ്', 'തരമണി' എന്നീ ചിത്രങ്ങൾക്ക് ശേഷം ദേശീയ അവാർഡ് ജേതാവായ റാം സംവിധാനം ചെയ്യുന്ന ചിത്രമാണിത്. മമ്മൂട്ടി നായകനായ പേരൻപിൽ മികച്ച പ്രകടനം പുറത്തെടുക്കാൻ റാമിന്റെ സംവിധാനത്തിന് സാധിച്ചിരുന്നു.

ഏകാംബരമാണ് ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത്. ചിത്രസംയോജനം: മതി വി.എസ്, വസ്ത്രാലങ്കാരം: ചന്ദ്രകാന്ത് സോനവാനെ, മേക്കപ്പ്: പട്ടണം റഷീദ്, പ്രൊഡക്ഷൻ ഡിസൈനർ: ഉമേഷ് ജെ. കുമാർ, ആക്ഷൻ: സ്റ്റണ്ട് സിൽവ, കൊറിയോഗ്രഫി: സാൻഡി, പി.ആർ.ഒ: ശബരി.