സൂരി ചിത്രം 'മണ്ടാടി' ഒടിടി റിലീസിനൊരുങ്ങുന്നു; എവിടെ കാണാം?

​ചെന്നൈ: തിയറ്ററുകളിൽ വൻ വിജയം നേടിയ സൂരി ചിത്രം 'മണ്ടാടി' ഒ.ടി.ടി റിലീസിനൊരുങ്ങുന്നു. സെപ്റ്റംബർ 10ന് തിയറ്ററുകളിലെത്തി പ്രേക്ഷക-നിരൂപക പ്രശംസകൾ പിടിച്ചുപറ്റിയ തീരദേശ ആക്ഷൻ ഡ്രാമ ചിത്രം ഒക്ടോബർ എട്ടു മുതൽ പ്രമുഖ ഒ.ടി.ടി പ്ലാറ്റ്‌ഫോമായ നെറ്റ്ഫ്ലിക്സിലൂടെ സ്ട്രീമിങ് ആരംഭിക്കുമെന്നാണ് റിപ്പോർട്ടുകൾ.

​മതിമാരൻ പുകഴേന്തി സംവിധാനം ചെയ്ത ചിത്രം ആഗോള ബോക്സ് ഓഫീസിൽ 125 കോടിയിലധികം രൂപ കളക്ഷൻ നേടി തിളങ്ങിയിരുന്നു. ഐമാക്‌സ് ഫോർമാറ്റിലും പ്രദർശനത്തിനെത്തിയ ചിത്രം തമിഴ്, തെലുങ്ക് ഭാഷകളിലാണ് റിലീസ് ചെയ്തത്. പ്രശസ്ത വിതരണക്കാരായ ശ്രീ ഗോകുലം മൂവീസിന് വേണ്ടി ഗോകുലം ഗോപാലനാണ് ചിത്രം കേരളത്തിലെ തിയറ്ററുകളിലെത്തിച്ചത്.

​തമിഴ്‌നാട്ടിലെ നൂറ് കിലോമീറ്ററോളം ദൈർഘ്യമുള്ള തീരപ്രദേശത്ത് നടക്കുന്ന സവിശേഷമായ സെയിലിങ് ബോട്ട് മത്സരത്തിന്റെ പശ്ചാത്തലത്തിലാണ് ചിത്രം കഥ പറയുന്നത്. മഹിമ നമ്പ്യാർ നായികയാകുന്ന ചിത്രത്തിൽ തെലുങ്ക് താരം സുഹാസാണ് വില്ലനായി എത്തുന്നത്. സൂരി, സുഹാസ് എന്നിവരുടെ പ്രകടനങ്ങൾ ചിത്രത്തിന്റെ പ്രധാന ആകർഷണങ്ങളിൽ ഒന്നാണ്.

​മുതിർന്ന നടൻ സത്യരാജ്, മിഥുൻ ജയ് ശങ്കർ, രവീന്ദ്ര വിജയ്, ബാല ശരവണൻ, സ്റ്റൺ ശിവ, കൃതിക ബാലസുബ്രഹ്മണ്യം എന്നിവരും പ്രധാന വേഷങ്ങളിലെത്തുന്നു. 'സെൽഫി'ക്ക് ശേഷം മതിമാരൻ പുകഴേന്തി സംവിധാനം ചെയ്ത ഈ ചിത്രം ആർ.എസ് ഇന്റർടെയ്ൻമെന്റിന്റെ ബാനറിൽ എൽറെഡ് കുമാറാണ് നിർമിച്ചത്.

​ദേശീയ അവാർഡ് ജേതാവ് ജി.വി. പ്രകാശ് കുമാർ സംഗീതവും എസ്.ആർ. കതിർ ഛായാഗ്രഹണവും പ്രദീപ് ഇ. രാഘവ് എഡിറ്റിങ്ങും നിർവഹിച്ചിരിക്കുന്നു.