‘കൂടിയാലോചനകളില്ല’; വി.ഡി. സതീശനെതിരെ മല്ലികാര്‍ജുന്‍ ഖർഗെയ്ക്ക് പരാതി നൽകി അടൂർ പ്രകാശ്
Nazeema
സ്റ്റാഫ് റിപ്പോർട്ടർ
യു.ഡി.എഫിൽ പരസ്പര കൂടിയാലോചനകൾ നടക്കുന്നില്ലെന്ന് ആരോപിച്ച് മുന്നണി കൺവീനർ അടൂർ പ്രകാശ് കോൺഗ്രസ് അധ്യക്ഷൻ മല്ലികാർജുൻ ഖർഗെയ്ക്ക് പരാതി നൽകി. വി.ഡി. സതീശൻ ഏകപക്ഷീയമായി തീരുമാനങ്ങളെടുക്കുന്നുവെന്നും പ്രധാന വിഷയങ്ങൾ മാധ്യമങ്ങളിലൂടെയാണ് അറിയുന്നതെന്നും ആരോപിച്ചാണ് ഹൈക്കമാൻഡിനെ സമീപിച്ചത്.
ന്യൂഡൽഹി: യു.ഡി.എഫിൽ പരസ്പര കൂടിയാലോചനകൾ നടക്കുന്നില്ലെന്ന പരാതിയുമായി യു.ഡി.എഫ് കൺവീനർ അടൂർ പ്രകാശ് കോൺഗ്രസ് അധ്യക്ഷൻ മല്ലികാർജുൻ ഖർഗെയെ സമീപിച്ചു. വിഷയം ചൂണ്ടിക്കാട്ടി ഹൈക്കമാൻഡിന് പരാതി നൽകിയതായി അടൂർ പ്രകാശ് സ്ഥിരീകരിച്ചു.
യു.ഡി.എഫ് ചെയർമാൻ കൂടിയായ വി.ഡി. സതീശൻ മുന്നണിയിൽ യാതൊരുവിധ കൂടിയാലോചനകളും നടത്തുന്നില്ലെന്നാണ് അടൂർ പ്രകാശിന്റെ പ്രധാന ആരോപണം. ബോർഡ്, കോർപറേഷൻ നിയമനങ്ങൾ ഉൾപ്പെടെയുള്ള നിർണായക തീരുമാനങ്ങൾ ചർച്ചയില്ലാതെയാണ് എടുത്തതെന്ന് അദ്ദേഹം ആരോപിച്ചു.
ഭരണപരിഷ്കാര കമ്മീഷൻ അധ്യക്ഷന്റെ നിയമനം, ഡൽഹിയിലെ കേരളത്തിന്റെ പ്രത്യേക പ്രതിനിധി നിയമനം തുടങ്ങിയ വിഷയങ്ങളിലും അദ്ദേഹം കടുത്ത അതൃപ്തി രേഖപ്പെടുത്തി. പ്രമുഖ തീരുമാനങ്ങളെല്ലാം മാധ്യമങ്ങളിലൂടെയാണ് താൻ അറിയുന്നതെന്ന് അടൂർ പ്രകാശ് പറഞ്ഞു.
മുന്നണി യോഗങ്ങൾ വിളിച്ചുചേർക്കേണ്ടത് ചെയർമാൻ എന്ന നിലയിൽ വി.ഡി. സതീശനാണെന്നും കൂട്ടായ ചർച്ചകളിലൂടെ വേണം പ്രധാന തീരുമാനങ്ങൾ കൈക്കൊള്ളേണ്ടതെന്നും അദ്ദേഹം വ്യക്തമാക്കി. വിഷയത്തിൽ കോൺഗ്രസ് നേതൃത്വത്തിന്റെ ഇടപെടൽ ആവശ്യപ്പെട്ടാണ് അടൂർ പ്രകാശ് ഹൈക്കമാൻഡിന് കത്തുനൽകിയത്.
