കൂടംകുളം 2030-ൽ പൂർണ്ണസജ്ജമാകും; കേരളത്തിന് ഇനി പവർകട്ട് ആശങ്കയില്ല, വൈദ്യുതി വിഹിതം 800 മെഗാവാട്ടായി ഉയരും

കൂടംകുളം 2030-ൽ പൂർണ്ണസജ്ജമാകും; കേരളത്തിന് ഇനി പവർകട്ട് ആശങ്കയില്ല, വൈദ്യുതി വിഹിതം 800 മെഗാവാട്ടായി ഉയരും

തിരുവനന്തപുരം: സംസ്ഥാനത്തെ രൂക്ഷമായ വൈദ്യുതി പ്രതിസന്ധിക്ക് പരിഹാരമായി കൂടംകുളം ആണവനിലയ പദ്ധതി. തമിഴ്‌നാട്ടിലെ തിരുനെൽവേലി ജില്ലയിലുള്ള കൂടംകുളം ആണവനിലയത്തിന്റെ വികസനം പൂർത്തിയാകുന്നതോടെ കേരളത്തിന് ലഭിക്കുന്ന വൈദ്യുതി വിഹിതത്തിൽ വലിയ വർദ്ധനവുണ്ടാകും.

ഇന്ത്യയിലെ ഏറ്റവും വലിയ ആണവനിലയങ്ങളിലൊന്നാണ് കൂടംകുളത്തുള്ളത്. നിലവിൽ 1,000 മെഗാവാട്ട് വീതം ഉല്പാദനശേഷിയുള്ള രണ്ടും റിയാക്ടറുകൾ ഇവിടെ പൂർണ്ണതോതിൽ പ്രവർത്തിക്കുന്നുണ്ട്. കേന്ദ്ര സർക്കാർ 1,38,330 കോടി രൂപയുടെ വികസന പദ്ധതികളാണ് കൂടംകുളത്തിനായി ആവിഷ്കരിച്ചിട്ടുള്ളത്. ഇതിൽ 3, 4 റിയാക്ടറുകൾക്കായി 68,893 കോടി രൂപയും 5, 6 റിയാക്ടറുകൾക്കായി 69,437 കോടി രൂപയുമാണ് അറ്റോമിക് എനർജി വകുപ്പ് ചെലവഴിക്കുന്നത്.

3 മുതൽ 6 വരെയുള്ള റിയാക്ടറുകൾ കൂടി പ്രവർത്തനക്ഷമമാകുന്നതോടെ നിലയത്തിന്റെ ആകെ ഉല്പാദനം 6,000 മെഗാവാട്ടായി ഉയരും. ഇതോടെ ഇന്ത്യയിലെ ആദ്യ 'ന്യൂക്ലിയർ പവർ പാർക്ക്' എന്ന പദവി കൂടംകുളത്തിന് ലഭിക്കും. ഒരു നിശ്ചിത സ്ഥലത്ത് 6,000 മെഗാവാട്ടോ അതിൽ കൂടുതലോ ഉല്പാദനശേഷിയുള്ള റിയാക്ടറുകൾ സ്ഥാപിക്കുമ്പോഴാണ് അതിനെ 'ന്യൂക്ലിയർ പവർ പാർക്ക്' എന്ന് വിശേഷിപ്പിക്കുന്നത്.

കേരളത്തിന് ലഭിക്കുന്ന നേട്ടം

നിലവിലെ 2,000 മെഗാവാട്ട് ഉല്പാദനത്തിൽ നിന്ന് 266 മെഗാവാട്ട് വൈദ്യുതിയാണ് കേരളത്തിന് വിഹിതമായി ലഭിക്കുന്നത്. ഇതിനു പുറമെ അൺ-അലോക്കേറ്റഡ് ക്വാട്ടയിൽ നിന്ന് 26.78 ശതമാനം അധിക വിഹിതവും സംസ്ഥാനത്തിന് ലഭിക്കുന്നുണ്ട് (യൂണിറ്റ് 1-ൽ നിന്ന് 13.48%, യൂണിറ്റ് 2-ൽ നിന്ന് 13.30%).

ഉല്പാദനം 6,000 മെഗാവാട്ടിലേക്ക് ഉയരുന്നതോടെ കേരളത്തിന്റെ അടിസ്ഥാന വിഹിതം 266 മെഗാവാട്ടിൽ നിന്ന് 800 മെഗാവാട്ടായി വർദ്ധിക്കും. ഒപ്പം അൺ-അലോക്കേറ്റഡ് വിഹിതത്തിലും ആനുപാതികമായ വർദ്ധനവുണ്ടാകും. ഇത് കേരളത്തിലെ ഉച്ചസ്ഥായിയിലുള്ള (Peak Load) വൈദ്യുതി ക്ഷാമത്തിന് വലിയ ആശ്വാസമാകും.

നിർമ്മാണ പുരോഗതി

3, 4 റിയാക്ടറുകൾ 2026–27 സാമ്പത്തിക വർഷത്തോടെ പൂർത്തിയാകും. 5, 6 റിയാക്ടറുകൾ 2029–30 സാമ്പത്തിക വർഷത്തോടെ പ്രവർത്തനം ആരംഭിക്കും. അഞ്ചാം യൂണിറ്റിൽ റിയാക്ടർ പ്രഷർ വെസൽ (RPV) സ്ഥാപിക്കുന്നതിന് അറ്റോമിക് എനർജി റെഗുലേറ്ററി ബോർഡ് (AERB) അനുമതി നൽകിയത് നിർമ്മാണ പ്രവർത്തനങ്ങളിലെ നിർണ്ണായക നാഴികക്കല്ലാണ്.

പശ്ചാത്തലവും ചരിത്രവും

കേന്ദ്ര അറ്റോമിക് എനർജി വകുപ്പിന്റെ കീഴിലുള്ള പൊതുമേഖലാ സ്ഥാപനമായ ന്യൂക്ലിയർ പവർ കോർപ്പറേഷൻ ഓഫ് ഇന്ത്യ ലിമിറ്റഡാണ് (NPCIL) നിലയത്തിന്റെ മേൽനോട്ടം വഹിക്കുന്നത്. 1988-ൽ അന്നത്തെ ഇന്ത്യൻ പ്രധാനമന്ത്രി രാജീവ് ഗാന്ധിയും സോവിയറ്റ് പ്രസിഡന്റ് മിഖായേൽ ഗോർബച്ചേവും തമ്മിൽ ഒപ്പുവെച്ച കരാറാണ് കൂടംകുളം പദ്ധതിയുടെ അടിസ്ഥാനം.

2001-ൽ വിശദമായ പദ്ധതിരേഖ തയ്യാറാക്കുകയും 2002 മേയിൽ 13,000 കോടി രൂപ ചെലവിൽ റഷ്യൻ സാങ്കേതിക സഹായത്തോടെ നിർമ്മാണം ആരംഭിക്കുകയും ചെയ്തു. 2014 ഡിസംബർ 31-ന് പ്രധാനമന്ത്രി നരേന്ദ്ര മോദി ഒന്നാം യൂണിറ്റ് രാജ്യത്തിന് സമർപ്പിച്ചു. 2017 മാർച്ച് 31-നാണ് രണ്ടാം യൂണിറ്റ് കമ്മീഷൻ ചെയ്തത്. റഷ്യൻ സര്ക്കാറിന്റെ 'റൊസാറ്റം' (Rosatom) കോർപ്പറേഷനാണ് സാങ്കേതിക സഹായം നൽകുന്നത്.

ഇന്ത്യയുടെ ആണവോർജ്ജ ലക്ഷ്യങ്ങൾ

ഇന്ത്യയുടെ ആണവോർജ്ജ മേഖല വലിയ വിപുലീകരണ ഘട്ടത്തിലാണെന്ന് കേന്ദ്ര സഹമന്ത്രി ഡോ. ജിതേന്ദ്ര സിംഗ് വ്യക്തമാക്കുന്നു.

• 2014-ൽ: 4,780 മെഗാവാട്ട്

• നിലവിൽ: 8,780 മെഗാവാട്ട്

• 2031–32-ൽ: 22,389 മെഗാവാട്ട്

• 2047-ഓടെ: 100 ജിഗാവാട്ട് (GW)

എന്നിങ്ങനെ ഉല്പാദനം വർധിപ്പിക്കാനാണ് രാജ്യം ലക്ഷ്യമിടുന്നത്.