യുഡിഎഫിൻ്റെ പോക്ക് ശരിയല്ലെന്ന് പറയുന്നത് കേട്ടാൽ ചിരിക്കുകയല്ലാതെ എന്ത് ചെയ്യാനെന്ന് ബിനോയ് വിശ്വം; വിമർശനം വി ശിവൻകുട്ടിക്കെതിരെ

പാലക്കാട്: യു.ഡി.എഫിന്റെ പോക്ക് ശരിയല്ലെന്ന് വിദ്യാഭ്യാസമന്ത്രി വി. ശിവൻകുട്ടി പറയുന്നത് കേട്ടാൽ ചിരിക്കുകയല്ലാതെ എന്ത് ചെയ്യാനാണെന്ന് സി.പി.ഐ സംസ്ഥാന സെക്രട്ടറി ബിനോയ് വിശ്വം. പി.എം ശ്രീ, എലപ്പുള്ളി ബ്രൂവറി വിഷയങ്ങളിൽ സി.പി.എമ്മിനെതിരെ അതിരൂക്ഷ വിമർശനമുന്നയിച്ച അദ്ദേഹം, ശിവൻകുട്ടിയുടെ നിലപാടിനെ പരിഹസിക്കുകയും ചെയ്തു. സി.പി.ഐ പാലക്കാട് ജില്ലാ പ്രവർത്തക യോഗത്തിൽ സംസാരിക്കുകയായിരുന്നു അദ്ദേഹം.

പി.എം ശ്രീ വിഷയത്തിൽ സി.പി.ഐയുടെ കൃത്യമായ ഇടപെടലാണ് എൽ.ഡി.എഫിനെ രക്ഷിച്ചതെന്ന് ബിനോയ് വിശ്വം പറഞ്ഞു. സി.പി.ഐ ഇല്ലായിരുന്നുവെങ്കിൽ പി.എം ശ്രീ വിഷയത്തിൽ എൽ.ഡി.എഫിന്റെ നയം സി.പി.എം അടിയറവ് വെക്കുമായിരുന്നു. ആർ.എസ്.എസിന്റെ അജണ്ടയാണ് പി.എം ശ്രീ എന്ന ഉറച്ച നിലപാടിൽ സി.പി.ഐ നിലകൊണ്ടതുകൊണ്ടാണ് ഇന്ന് മുന്നണിക്ക് തലയുയർത്തി നിൽക്കാൻ സാധിക്കുന്നത്. ഒടുവിൽ സി.പി.ഐയുടെ ഈ നിലപാടാണ് ശരിയെന്ന് സി.പി.എമ്മിന്റെ കേന്ദ്രനേതൃത്വത്തിന് തന്നെ സമ്മതിക്കേണ്ടി വന്നു. സി.പി.എമ്മിനെക്കൂടി ശരിയായ പാതയിലേക്ക് നയിച്ച് രക്ഷിച്ചെടുത്തത് സി.പി.ഐ ആണെന്ന് ഓർമിപ്പിച്ച അദ്ദേഹം, ഇപ്പോൾ അതേ വിഷയത്തിൽ യു.ഡി.എഫിന്റെ പോക്ക് ശരിയല്ലെന്ന് ശിവൻകുട്ടി പറയുന്നത് തമാശയാണെന്നും കൂട്ടിച്ചേർത്തു.

പാലക്കാട് എലപ്പുള്ളിയിൽ ബ്രൂവറി വേണ്ട എന്ന നിലപാടിലും സി.പി.ഐ ഉറച്ചുനിൽക്കുകയായിരുന്നുവെന്ന് അദ്ദേഹം വ്യക്തമാക്കി. എൽ.ഡി.എഫ് മന്ത്രിമാരുമായുള്ള കൂടിക്കാഴ്ചയിൽ സി.പി.എം സംസ്ഥാന സെക്രട്ടറി എം.വി. ഗോവിന്ദൻ ബ്രൂവറിയുടെ നേട്ടങ്ങൾ നിരത്തിയപ്പോൾ അതിനെ തള്ളിപ്പറഞ്ഞത് താനായിരുന്നുവെന്നും ബിനോയ് വിശ്വം വെളിപ്പെടുത്തി.