ആധാർ പേര് തിരുത്താൻ പുതിയ നിയമങ്ങൾ; ഇനി എന്തൊക്കെ മാറും?

യുഐഡിഎഐ (UIDAI) പുറത്തിറക്കിയ പുതിയ സ്റ്റാൻഡേർഡ് ഓപ്പറേറ്റിങ് പ്രൊസീജർ (SOP) പ്രകാരം ആധാർ കാർഡിലെ പേര് തിരുത്തുന്നതിനുള്ള നടപടിക്രമങ്ങളിൽ നിർണായക മാറ്റങ്ങൾ പ്രാബല്യത്തിൽ വന്നു. അപേക്ഷകളെ വിവിധ വിഭാഗങ്ങളായി തിരിച്ചാണ് ഇനി പരിഗണിക്കുക.

പുതിയ നിയമങ്ങൾ പ്രകാരമുള്ള പ്രധാന മാറ്റങ്ങളും വിഭാഗങ്ങളും താഴെ പറയുന്നവയാണ്:

1. ചെറിയ പേരുതിരുത്തലുകൾ പേരിന്റെ ആദ്യാക്ഷരങ്ങൾ പൂർണരൂപത്തിലാക്കുക, മധ്യനാമമോ കുടുംബപ്പേരോ ചേർക്കുകയോ ഒഴിവാക്കുകയോ ചെയ്യുക, പേരുകളുടെ ക്രമം മാറ്റുക, ചെറിയ അക്ഷരപ്പിശകുകൾ തിരുത്തുക തുടങ്ങിയവയാണ് ഈ വിഭാഗത്തിൽ വരുന്നത്. സാധുവായ ഏതെങ്കിലും ഒരു തിരിച്ചറിയൽ രേഖ (PoI) സമർപ്പിച്ച് ഇവ തിരുത്താം. 18 വയസ്സിന് താഴെയുള്ളവർക്ക് കുടുംബനാഥനുമായുള്ള ബന്ധം തെളിയിക്കുന്ന രേഖയും (PoR) ഉപയോഗിക്കാം.

2. വിവരങ്ങൾ രേഖപ്പെടുത്തുമ്പോഴുണ്ടായ പിഴവുകൾ ആധാർ എടുക്കുമ്പോൾ ഉദ്യോഗസ്ഥർക്കോ വിവരശേഖരണവേളയിലോ ഉണ്ടായ പിഴവാണെങ്കിൽ:

• മുതിർന്നവർ: അനുബന്ധം-ബി (Annexure-B) സത്യവാങ്മൂലത്തോടൊപ്പം തിരിച്ചറിയൽ രേഖ സമർപ്പിക്കണം.

• പ്രായപൂർത്തിയാകാത്തവർ: മാതാപിതാക്കളോ രക്ഷിതാക്കളോ അനുബന്ധം-സി (Annexure-C) സത്യവാങ്മൂലം സമർപ്പിക്കണം. (ശ്രദ്ധിക്കുക: അപേക്ഷിക്കുന്ന പേര് നേരത്തെ സമർപ്പിച്ച രേഖകളുമായി പൊരുത്തപ്പെട്ടില്ലെങ്കിൽ അപേക്ഷ നിരസിക്കപ്പെടും).

3. വിവാഹം, വിവാഹമോചനം, ലിംഗമാറ്റം

• വിവാഹം/വിവാഹമോചനം: കുടുംബപ്പേര് മാറ്റാൻ ആഗ്രഹിക്കുന്ന സ്ത്രീകൾ അനുബന്ധം-ഡി (Annexure-D) സത്യവാങ്മൂലത്തോടൊപ്പം തിരിച്ചറിയൽ രേഖയോ രജിസ്റ്റർ ചെയ്ത വിവാഹ സർട്ടിഫിക്കറ്റോ സമർപ്പിക്കണം.

• ലിംഗമാറ്റം: ലിംഗമാറ്റത്തെ തുടർന്നുള്ള പേരുമാറ്റത്തിനും അനുയോജ്യമായ തിരിച്ചറിയൽ രേഖ നിർബന്ധമാണ്.

4. രേഖകൾ ആവശ്യമില്ലാത്ത തിരുത്തലുകൾ

• വലിയക്ഷരങ്ങളുടെ (Capital letters) ക്രമത്തിലെ പിഴവ് തിരുത്തുന്നതിനും പേരിനിടയിലെ കുത്തുകൾ (Dots) ഒഴിവാക്കുന്നതിനും രേഖകൾ ആവശ്യമില്ല.

• പേരിലെ ഏതെങ്കിലും ഒരു ഭാഗം മാത്രം നിലനിർത്താൻ: മുതിർന്നവർ അനുബന്ധം-ഇ (Annexure-E) സത്യവാങ്മൂലവും കുട്ടികൾ അനുബന്ധം-എഫ് (Annexure-F) സത്യവാങ്മൂലവും നൽകണം.

5. പൂർണമായ പേരുമാറ്റം (ഗസറ്റ് വിജ്ഞാപനം നിർബന്ധം) വ്യക്തിയുടെ തിരിച്ചറിയലിനെത്തന്നെ ബാധിക്കുന്ന രീതിയിൽ പേര് പൂർണമായി മാറ്റുകയാണെങ്കിൽ ഗസറ്റ് വിജ്ഞാപനം (Gazette Notification) നിർബന്ധമാണ്. ഗസറ്റ് വിജ്ഞാപനത്തോടൊപ്പം തിരിച്ചറിയൽ രേഖയും സമർപ്പിക്കണം.

സമർപ്പിക്കുന്ന രേഖകളുടെയും സത്യവാങ്മൂലങ്ങളുടെയും ആധികാരികത കർശനമായി പരിശോധിച്ച ശേഷമായിരിക്കും യുഐഡിഎഐ നടപടികൾ പൂർത്തിയാക്കുക. അതിനാൽ അപേക്ഷ സമർപ്പിക്കുന്നതിന് മുമ്പ് തിരുത്തലുകൾ ഏത് വിഭാഗത്തിൽപ്പെടുന്നുവെന്ന് ഉറപ്പുവരുത്തേണ്ടതുണ്ട്.