അടൂർ പ്രകാശിന്റെ തുറന്നുപറച്ചിൽ; ചർച്ചകൾ വേണമെന്ന് മന്ത്രി എ പി അനിൽ കുമാർ; തീരുമാനം മുന്നണിയെ അറിയിക്കും

മലപ്പുറം: സർക്കാരിൽ നടക്കുന്ന കാര്യങ്ങൾ ഒന്നും അറിയുന്നില്ലെന്നും പല വിവരങ്ങളും മാധ്യമങ്ങളിലൂടെയാണ് അറിയുന്നതെന്നുമുള്ള യു.ഡി.എഫ് കൺവീനർ അടൂർ പ്രകാശിന്റെ വെളിപ്പെടുത്തലിൽ പ്രതികരണവുമായി മന്ത്രി എ.പി. അനിൽ കുമാർ. ഭരണതലത്തിൽ കൂടുതൽ ചർച്ചകളും കൂടിയാലോചനകളും അനിവാര്യമാണെന്ന് വ്യക്തമാക്കിയ അദ്ദേഹം, വിഷയത്തിലുള്ള തന്റെ നിലപാട് മുന്നണിയെ അറിയിക്കുമെന്നും മലപ്പുറത്ത് മാധ്യമങ്ങളോട് പറഞ്ഞു.

എല്ലാ കാര്യങ്ങളും കെ.സി. വേണുഗോപാലിൽ കേന്ദ്രീകരിക്കേണ്ടതില്ലെന്നും മന്ത്രി ചൂണ്ടിക്കാട്ടി. മുഖ്യമന്ത്രിയെ തീരുമാനിക്കുന്ന വേളയിൽ വേണുഗോപാലിനെ മാധ്യമങ്ങൾ വേട്ടയാടുകയായിരുന്നു. പാർട്ടിയിലെ അഭിപ്രായവ്യത്യാസങ്ങൾ സംഘടനാ വേദികളിൽ ഉന്നയിക്കുന്നതാണ് തന്റെ ശീലമെന്നും എ.പി. അനിൽ കുമാർ കൂട്ടിച്ചേർത്തു.

അതേസമയം, തിരുവനന്തപുരത്ത് മന്ത്രിമാരെ എസ്.എഫ്.ഐയും ഡി.വൈ.എഫ്.ഐയും തടയുന്ന നടപടിയെ അദ്ദേഹം ശക്തമായി വിമർശിച്ചു. തലസ്ഥാനത്ത് യൂത്ത് കോൺഗ്രസ് സമരം നടത്തിയത് ബി.ജെ.പിക്ക് എതിരെയല്ലാതെ സി.പി.എമ്മിന് എതിരെയല്ല. ഈ സാഹചര്യത്തിൽ എന്തിനാണ് ഡെമോക്രാറ്റിക് യുവജന സംഘടനകൾ മന്ത്രിമാരെ തടയുന്നതെന്ന് മനസ്സിലാകുന്നില്ലെന്നും ബി.ജെ.പിക്കെതിരെ സമരം ചെയ്യുമ്പോൾ സി.പി.എമ്മിന് എന്തിനാണ് പൊള്ളുന്നതെന്നും അദ്ദേഹം ചോദിച്ചു.

അടൂർ പ്രകാശ് പാർട്ടി വേദികളിൽ പറയണം: കെ. മുരളീധരൻ

അടൂർ പ്രകാശ് ഉന്നയിച്ച കാര്യങ്ങൾ പാർട്ടി വേദികളിലാണ് ചർച്ച ചെയ്യേണ്ടതെന്ന് മന്ത്രി കെ. മുരളീധരൻ വ്യക്തമാക്കി. ഭരണപരമായ ആവശ്യമായ വിവരങ്ങളൊക്കെ മുഖ്യമന്ത്രി തന്നെ കൃത്യമായി അറിയിക്കുന്നുണ്ട്. കാര്യങ്ങൾ പത്രങ്ങളിലൂടെയാണ് അറിയുന്നതെന്ന് മുൻപ് താൻ പരാതിപ്പെട്ടിരുന്നെന്നും അതിൽ വലിയ വിമർശനങ്ങൾ നേരിടേണ്ടി വന്നിട്ടുണ്ടെന്നും ചൂണ്ടിക്കാട്ടിയ മുരളീധരൻ, ഇപ്പോൾ തനിക്ക് അത്തരം പരാതികളൊന്നുമില്ലെന്നും വ്യക്തമാക്കി.