'ഞാൻ മുൻ എസ്എഫ്ഐ പ്രവർത്തകൻ, കോടിയേരിയുടെ ഫ്ലക്സ് ബോർഡ് 'കോൺഗ്രസിന്റെ ഫ്ലക്സാണെന്ന് കരുതി മാറി കീറിയത്'; വിശദീകരണവുമായി അക്ബർ ഷാ

കൊല്ലം: വിപ്ലവപ്രസ്ഥാനത്തിന്റെ മുൻ സംസ്ഥാന സെക്രട്ടറിയുടെ ഫ്ലക്സ് ബോർഡ് കീറിപ്പോയതിൽ വിശദീകരണവും നിരുപാധിക ക്ഷമാപണവുമായി യുവാവ്. തിരുവനന്തപുരത്തെ യൂണിവേഴ്സിറ്റി ഹോസ്റ്റൽ ലാത്തിച്ചാർജിൽ പ്രതിഷേധിച്ച് കൊല്ലത്ത് എസ്.എഫ്.ഐ നടത്തിയ പ്രകടനത്തിനിടെ സി.പി.എം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ ഫ്ലക്സ് ബോർഡ് നശിപ്പിച്ച സംഭവത്തിലാണ് കിളികൊല്ലൂർ സ്വദേശി അക്ബർ ഷാ വിശദീകരണ വീഡിയോയുമായി രംഗത്തെത്തിയത്.

കോൺഗ്രസിന്റെ ഫ്ലക്സ് ബോർഡാണെന്ന് തെറ്റിദ്ധരിച്ചാണ് കോടിയേരിയുടെ ഫ്ലക്സ് കീറിയതെന്നും സംഭവിച്ചതിൽ തെറ്റ് മനസ്സിലാക്കി എല്ലാവരോടും ക്ഷമ ചോദിക്കുന്നുവെന്നും അക്ബർ ഷാ വീഡിയോയിൽ പറഞ്ഞു. താൻ പ്രകടനത്തിലേക്ക് ബോധപൂർവം നുഴഞ്ഞുകയറിയതാണെന്ന എസ്.എഫ്.ഐ നേതൃത്വത്തിന്റെ ആരോപണവും ഇയാൾ തള്ളി.

"മൂന്ന് വർഷം മുൻപ് വിദേശത്തേക്ക് പോയ ഞാൻ അടുത്തിടെയാണ് നാട്ടിൽ മടങ്ങിയെത്തിയത്. പ്രകടനം കണ്ടപ്പോൾ ആവേശത്തിൽ പങ്കാളിയാവുകയായിരുന്നു. അല്ലാതെ ആസൂത്രിതമായി നുഴഞ്ഞുകയറി അക്രമം അഴിച്ചുവിട്ടതല്ല. താൻ കിളികൊല്ലൂരിലെ മുൻകാല എസ്.എഫ്.ഐ പ്രവർത്തകനും നിലവിൽ ഡി.വൈ.എഫ്.ഐ പ്രവർത്തകനുമാണ്. എന്നാൽ ഇപ്പോൾ പാർട്ടിക്കാർ തന്നെ താൻ പ്രസ്ഥാനത്തിൽ ഇല്ലെന്നും നുഴഞ്ഞുകയറിയതാണെന്നും പ്രചരിപ്പിക്കുകയാണ്" - അക്ബർ ഷാ വീഡിയോയിൽ വ്യക്തമാക്കി.

ചെയ്തത് വലിയ തെറ്റാണെന്ന് ബോധ്യപ്പെട്ടെന്നും കോടിയേരി സഖാവിന്റെ ഫ്ലക്സാണെന്ന് കരുതിയല്ല കീറിയതെന്നും കോൺഗ്രസിന്റെ ഫ്ലക്സാണെന്ന തെറ്റിദ്ധാരണയിലാണ് സംഭവിച്ചതെന്നും വ്യക്തമാക്കിയ അക്ബർ ഷാ, എല്ലാവരും തന്നോട് ദയവുചെയ്ത് ക്ഷമിക്കണമെന്നും അഭ്യർത്ഥിച്ചു.