നെല്ല്‌ സംഭരണം ധാരണാപത്രം ഒപ്പിടാതെ മില്ലുകാര്‍ കര്‍ഷകരെയും സര്‍ക്കാരിനെയും സമ്മര്‍ദത്തിലാക്കാനെന്ന്‌ ആക്ഷേപം

ആലപ്പുഴ: അരി ലഭ്യത അനുപാതത്തിലെ കുടിശിക ലഭിക്കാത്തതിനെത്തുടർന്ന് നെല്ല് സംഭരണത്തിനുള്ള ധാരണാപത്രത്തിൽ ഒപ്പുവെക്കാൻ മില്ലുടമകൾ വിസമ്മതിക്കുന്നു. രണ്ടാംകൃഷി വിളവെടുപ്പ് ആരംഭിക്കാനിരിക്കെ, കർഷകരെയും സർക്കാരിനെയും സമ്മർദ്ദത്തിലാക്കാനാണ് മില്ലുകാരുടെ ശ്രമമെന്നാണ് ആക്ഷേപം. സപ്ലൈകോ ഉദ്യോഗസ്ഥരുടെ നേതൃത്വത്തിൽ നടത്തിയ ചർച്ചയിൽ 11 ഇടത്തരം മില്ലുകൾ മാത്രമാണ് സംഭരണത്തിന് സന്നദ്ധത അറിയിച്ചത്. പുഞ്ചക്കൃഷി സീസണിൽ 47 മില്ലുകൾ നെല്ല് സംഭരിച്ചിരുന്നു.

സഹകരണ സംഘങ്ങൾ വഴി നെല്ല് സംഭരിക്കുമെന്ന പ്രഖ്യാപനം പാലക്കാട് ഒഴികെയുള്ള ജില്ലകളിൽ നടപ്പായിട്ടില്ല. മില്ലുകൾ നെല്ലെടുക്കാതിരുന്നാൽ കടുത്ത ചൂടിൽ പാടത്ത് കിടന്ന് നെല്ലിന്റെ തൂക്കം കുറയാൻ ഇടയാക്കുമെന്ന ആശങ്കയിലാണ് കർഷകർ.

മുൻവർഷങ്ങളിലെ 'ഔട്ട് ടേൺ റേഷ്യോ' കുടിശിക തീർപ്പാക്കുക, ഒന്നാം വിളയിലെന്നപോലെ ക്വിന്റലിന് 1.5 കിലോ അരിയുടെ കിഴിവ് അനുവദിക്കുക എന്നിവയാണ് മില്ലുടമകളുടെ പ്രധാന ആവശ്യങ്ങൾ. കേന്ദ്ര മാനദണ്ഡപ്രകാരം 100 കിലോ നെല്ല് സംസ്കരിക്കുമ്പോൾ 68 കിലോ അരി തിരികെ നൽകണം. എന്നാൽ കാലാവസ്ഥാ വ്യതിയാനവും പ്രതിസന്ധികളും കണക്കിലെടുത്ത് സംസ്ഥാന സർക്കാർ ഇത് 64.5 ശതമാനമായി കുറച്ചിരുന്നു. വിട്ടുനൽകിയ 3.5 ശതമാനത്തിന്റെ തുകയായ 60 കോടിയിലധികം രൂപ നിലവിൽ സർക്കാരിൽ നിന്ന് മില്ല ഉടമകൾക്ക് കുടിശികയായി ലഭിക്കാനുണ്ട്. ഈ തുക ഉടൻ വിതരണം ചെയ്യാൻ സർക്കാർതല ഇടപെടൽ ഉണ്ടാകണമെന്നാണ് മില്ലുടമകളുടെ ആവശ്യം.