'വിവാദത്തിലേക്ക് വലിച്ചിഴക്കപ്പെട്ടു', പ്രതിസന്ധി സൃഷ്ടിച്ച് പദവിയിലേക്ക് വരുന്നതിൽ പ്രയാസമെന്നും മുനീർ

കോഴിക്കോട്: ഭരണപരിഷ്‌കാര കമ്മിഷൻ അധ്യക്ഷ സ്ഥാനവുമായി ബന്ധപ്പെട്ട വിവാദങ്ങളിൽ പരസ്യ പ്രതികരണവുമായി മുസ്ലിം ലീഗ് നേതാവ് ഡോ. എം.കെ. മുനീർ. തന്നെ ആവശ്യമില്ലാതെ വിവാദങ്ങളിലേക്ക് വലിച്ചിഴച്ചതിലും പ്രതിസന്ധികൾ സൃഷ്ടിച്ച് പദവി ഏറ്റെടുക്കുന്നതിലും വലിയ പ്രയാസമുണ്ടെന്ന് അദ്ദേഹം വ്യക്തമാക്കി. ഭരണപരിഷ്കാര കമ്മീഷൻ എന്നത് ഒരു ആലങ്കാരിക പദവിയല്ലെന്നും ഏഷ്യാനെറ്റ് ന്യൂസിന് നൽകിയ അഭിമുഖത്തിൽ മുനീർ കൂട്ടിച്ചേർത്തു.

"ഭരണപരിഷ്കാര കമ്മീഷൻ പദവി സംബന്ധിച്ച് യു.ഡി.എഫിൽ പല തലങ്ങളിലുള്ള ചർച്ചകൾ നടന്നിട്ടുണ്ടാകാം. അതുകൊണ്ടാണ് അന്തിമ തീരുമാനത്തിലേക്ക് എത്താൻ വൈകിയത്. ഇതാരെയെങ്കിലും സഹായിക്കാനോ തൃപ്തിപ്പെടുത്താനോ വേണ്ടിയുള്ള ആലങ്കാരിക പദവിയല്ല. മുസ്ലിം ലീഗിന്റെ രാഷ്ട്രീയ പ്രസക്തി ഇന്നോ ഇന്നലെയോ ചർച്ച ചെയ്യാൻ തുടങ്ങിയതുമല്ല. എന്നെ പുനരധിവസിപ്പിക്കാനുള്ള ഒരു പദവിയായിരുന്നു ഇതെങ്കിൽ ഉയർന്നുവന്ന വിമർശനങ്ങളിൽ ന്യായമുണ്ടായിരുന്നു. അങ്ങനെയായിരുന്നെങ്കിൽ ആ വിമർശനങ്ങൾക്കൊപ്പം ഞാനും നിലയുറപ്പിക്കുമായിരുന്നു" - മുനീർ വ്യക്തമാക്കി.

കഴിഞ്ഞ നിയമസഭാ തെരഞ്ഞെടുപ്പിൽ ആരോഗ്യപരമായ കാരണങ്ങളാൽ മത്സരിക്കാതിരുന്ന മുനീറിന് ക്യാബിനറ്റ് പദവിയുള്ള സ്ഥാനം നൽകാമെന്ന് യു.ഡി.എഫ് നേതൃത്വം ധാരണയിലെത്തിയിരുന്നു. എന്നാൽ, ഈ പദവി കോൺഗ്രസിലെ മുതിർന്ന നേതാക്കൾക്ക് നൽകണമെന്ന ആവശ്യവുമായി ഒരു വിഭാഗം രംഗത്തെത്തിയതാണ് യു.ഡി.എഫിനെ പ്രതിസന്ധിയിലാക്കിയത്. മുന്നണിയിൽ ലവലേശം ചർച്ച ചെയ്യാതെയാണ് പ്രതിപക്ഷ നേതാവ് വി.ഡി. സതീശൻ ലീഗുമായി ചർച്ച നടത്തി തീരുമാനമെടുത്തതെന്നാരോപിച്ച് യു.ഡി.എഫ് കൺവീനർ അടൂർ പ്രകാശ് രംഗത്തുവന്നതോടെ വിഷയം മുന്നണിയിൽ വലിയ പൊട്ടിത്തെറിക്ക് വഴിതുറക്കുകയായിരുന്നു.