ഗ്യാനേഷ് കുമാറിനെതിരായ കെഎസ്‍ടിപി അഴിമതി കേസ്: കരുതലോടെ നീങ്ങാൻ വിജിലൻസ്, പുനരന്വേഷണ സാധ്യത പരിശോധിക്കാൻ നിർദേശം

​തിരുവനന്തപുരം: കേന്ദ്ര മുഖ്യ തെരഞ്ഞെടുപ്പ് കമീഷണർ ഗ്യാനേഷ് കുമാറിനെതിരായ കെ.എസ്.ടി.പി (കേരള സ്റ്റേറ്റ് ട്രാൻസ്പോർട്ട് പ്രൊജക്ട്) അഴിമതിക്കേസിൽ വിജിലൻസ് പുനരന്വേഷണ സാധ്യതകൾ തേടുന്നത് അതീവ ജാഗ്രതയോടെ. ആരോപണത്തിൽ വിജിലൻസ് ഡയറക്ടറുടെ നിർദേശപ്രകാരം സ്പെഷ്യൽ ഇൻവെസ്റ്റിഗേഷൻ യൂണിറ്റ് (എസ്.ഐ.യു-1) പ്രിലിമിനറി പരിശോധന ആരംഭിച്ചു. 2007-ൽ കേസ് അന്വേഷിച്ച് ക്ലീൻ ചിറ്റ് നൽകിയ മുൻ റിപ്പോർട്ടും അന്നത്തെ മൊഴികളും പരിശോധിച്ച ശേഷം മാത്രമേ പുതിയ കേസ് രജിസ്റ്റർ ചെയ്യുന്നതിലേക്ക് വിജിലൻസ് കടക്കൂ.

​രണ്ട് ദിവസത്തിനകം ഇത് സംബന്ധിച്ച് വ്യക്തമായ റിപ്പോർട്ട് സമർപ്പിക്കാനാണ് എസ്.പിക്ക് നൽകിയിരിക്കുന്ന നിർദേശം. രാജ്യശ്രദ്ധയാകർഷിച്ച കേസ് ആയതിനാൽ തന്നെ നിയമപരമായ എല്ലാ വശങ്ങളും കൃത്യമായി പരിശോധിച്ചാവും ആഭ്യന്തര വകുപ്പിന്റെ തുടർനടപടികൾ.

​കെ.പി.സി.സി നിർവാഹക സമിതി അംഗത്തിന്റെ പരാതിയിൽ ആഭ്യന്തര മന്ത്രി രമേശ് ചെന്നിത്തല നൽകിയ നിർദേശാനുസരണമാണ് ഫയൽ വിജിലൻസ് ഡയറക്ടറിലേക്ക് എത്തിയത്. 2006-ൽ ഗ്യാനേഷ് കുമാർ സംസ്ഥാന പൊതുമരാമത്ത് സെക്രട്ടറിയായിരിക്കെ കെ.എസ്.ടി.പി പദ്ധതി നടത്തിപ്പുമായി ബന്ധപ്പെട്ട് ക്രമക്കേട് നടന്നെന്നാണ് ആരോപണം.

​നിയമനടപടികളിൽ വിജിലൻസിന് മുന്നിലുള്ള പ്രധാന കടമ്പകൾ:

​മരണ അന്വേഷണത്തിലെ പരിമിതി: പദ്ധതി ഏറ്റെടുത്ത ഇൻഡോ-മലേഷ്യൻ കൺസോർഷ്യമായ 'പതിബെൽ' കമ്പനിയുടെ പ്രൊജക്ട് ഡയറക്ടർ ലീ സീ ബിൻ ജീവനൊടുക്കിയ സംഭവമാണ് കേസിനാസ്പദമായ പ്രധാന പശ്ചാത്തലം. എന്നാൽ വിദേശത്ത് നടന്ന മരണത്തെക്കുറിച്ച് അന്വേഷിക്കാൻ വിജിലൻസിന് നിയമപരമായ പരിമിതികളുണ്ട്; അഴിമതി ആരോപണത്തിൽ മാത്രമാണ് നിലവിൽ അന്വേഷണം ഊന്നുന്നത്.

​ആത്മഹത്യാക്കുറിപ്പ് തെളിവായി ലഭിച്ചിട്ടില്ല: ലീ സീ ബിൻ അഴിമതി ചൂണ്ടിക്കാട്ടി എഴുതിയതായി പറയപ്പെടുന്ന ആത്മഹത്യാക്കുറിപ്പ് വിജിലൻസ് സംഘത്തിന് ഇതുവരെ നേരിട്ട് ലഭിച്ചിട്ടില്ല. മുൻ എൽ.ഡി.എഫ് സർക്കാറിന്റെ കാലത്ത് ഇത് ശേഖരിക്കാൻ ശ്രമം നടത്തിയെങ്കിലും പരാജയപ്പെടുകയായിരുന്നു.

​മൊഴികളുടെ പുനഃപരിശോധന: പൊതുഭരണ, ധനകാര്യ, പി.ഡബ്ല്യു.ഡി വകുപ്പുകളിലെയും പതിബെൽ കമ്പനി പ്രതിനിധികളുടെയും പഴയ മൊഴികൾ വിജിലൻസ് വീണ്ടും രേഖപ്പെടുത്തും. സാങ്കേതിക തടസ്സങ്ങൾ ചൂണ്ടിക്കാട്ടിയാണ് കരാറുകാരുടെ ബില്ലുകൾ മാറുന്നതിലുണ്ടായ കാലതാമസത്തെ മുൻ ഉദ്യോഗസ്ഥർ ന്യായീകരിച്ചിരുന്നത്.

​മുൻകൂർ അനുമതി: ഭരണഘടനാ പദവിയിലുള്ള ഉദ്യോഗസ്ഥനെതിരെ കേസ് രജിസ്റ്റർ ചെയ്ത് അന്വേഷണം മുന്നോട്ട് കൊണ്ടുപോകണമെങ്കിൽ കേന്ദ്ര ഏജൻസികളുടെയോ ബന്ധപ്പെട്ട ഭരണകൂടത്തിന്റെയോ പ്രോസിക്യൂഷൻ അനുമതി ആവശ്യമായി വരും.

​അതേസമയം, 20 വർഷത്തോളം പഴക്കമുള്ള കേസാണെന്നത് പുനരന്വേഷണത്തിന് തടസ്സമല്ലെന്നാണ് ഡി.ജി.പിയുടെ നിയമോപദേശം. വിദേശത്തുള്ള ലീ സീ ബിന്നിന്റെ ബന്ധുക്കളിൽ നിന്നും മറ്റും വിവരങ്ങൾ ശേഖരിക്കേണ്ടി വന്നാൽ നയതന്ത്ര തലത്തിലും കേന്ദ്ര ഏജൻസികളുടെ സഹായത്തോടെയും മാത്രം നടപടികളിലേക്ക് വിജിലൻസിന് നീങ്ങേണ്ടി വരും. പ്രാഥമിക പരിശോധന റിപ്പോർട്ടിന് ശേഷമേ എഫ്.ഐ.ആർ രജിസ്റ്റർ ചെയ്യണമോ എന്ന കാര്യത്തിൽ അന്തിമ തീരുമാനം എടുക്കൂ.