വീട്ടിലേക്ക് മാർച്ച് നടത്തിയാൽ പാ‍ർട്ടി ഓഫീസിൽ കയറും, എസ്എഫ് ഐ ജില്ലാസെക്രട്ടറിക്ക് എസ്ഐയുടെ ഭീഷണി, അടിയന്തര നടപടിക്ക് നി‍ർദേശിച്ച് എഡിജിപി

തിരുവനന്തപുരം: തലസ്ഥാനത്ത് സംഘർഷാവസ്ഥ തുടരുന്നതിനിടെ എസ്എഫ്ഐ ജില്ലാ സെക്രട്ടറിയെ ഭീഷണിപ്പെടുത്തുന്ന കന്റോൺമെന്റ് എസ്ഐയുടെ ശബ്ദരേഖ പുറത്ത്. പൊലീസുകാരുടെ വീട്ടിലേക്ക് മാർച്ച് നടത്തിയാൽ പാർട്ടി ഓഫീസിൽ കയറുമെന്ന നിലപാടിലാണ് എസ്ഐ ഗോകുൽ എസ്എഫ്ഐ ജില്ലാ സെക്രട്ടറി നന്ദനോട് സംസാരിക്കുന്നത്. സംഭവത്തിൽ അടിയന്തര അന്വേഷണം നടത്തി നടപടിയെടുക്കാൻ എഡിജിപി പി. വിജയൻ തിരുവനന്തപുരം സിറ്റി പൊലീസ് കമ്മീഷണർക്ക് നിർദേശം നൽകി.

കഴിഞ്ഞ ബുധനാഴ്ച യൂത്ത് കോൺഗ്രസ് മാർച്ചിനിടെയാണ് പ്രശ്നങ്ങളുടെ തുടക്കം. മാർച്ചിനിടെ യൂണിവേഴ്സിറ്റി ഹോസ്റ്റലിൽ നിന്ന് കൂവലുണ്ടായതിനെ തുടർന്ന് യൂത്ത് കോൺഗ്രസുകാർ തീപ്പന്തവും കല്ലും എറിയുകയായിരുന്നുവെന്നാണ് ആരോപണം. എന്നാൽ, എസ്എഫ്ഐ പ്രവർത്തകർ നേരത്തെ കല്ലെറിഞ്ഞതാണ് അക്രമത്തിന് കാരണമായതെന്നാണ് കോൺഗ്രസ് പക്ഷം. തുടർന്ന് ഹോസ്റ്റലിൽ കയറി വിദ്യാർത്ഥികളെ തല്ലിച്ചതച്ച കന്റോൺമെന്റ് എസ്എച്ച്ഒ സതീഷ്, എസ്ഐ ഗോകുൽ എന്നിവർക്കെതിരെ സിപിഎം രംഗത്തെത്തി.

ഇരു പൊലീസുകാരുടെയും വീടുകളിലേക്ക് പ്രക്ഷോഭം നടത്തുമെന്ന് സിപിഎം പ്രഖ്യാപിച്ചതിന് പിന്നാലെയാണ് എസ്ഐ ഗോകുൽ എസ്എഫ്ഐ നേതാവിനെ ഫോണിൽ വിളിച്ച് ഭീഷണിപ്പെടുത്തിയത്. "വീട്ടിലേക്ക് മാർച്ച് നടത്തിയാൽ പാർട്ടി ഓഫീസിൽ കയറും. ചെയ്യാൻ പറ്റുന്നതൊക്കെ നീ ചെയ്യ്. ആഭ്യന്തരമന്ത്രി പറഞ്ഞതുകൊണ്ടാണ് അറസ്റ്റ് നീട്ടിവെച്ചത്. നീ എവിടെയാണുള്ളതെന്ന് വ്യക്തമായി അറിയാം" എന്നതടക്കമുള്ള പരാമർശങ്ങളാണ് ശബ്ദരേഖയിലുള്ളത്.

പൊലീസ് ഉദ്യോഗസ്ഥർക്കെതിരെ നടപടി ആവശ്യപ്പെട്ട് സിപിഎം നേതാക്കൾ ആഭ്യന്തരമന്ത്റിയെ നേരിട്ട് കണ്ട് പരാതി നൽകിയിട്ടുണ്ട്. അതിനിടെ, പൊലീസിനെ ഭീഷണിപ്പെടുത്തിയെന്നാരോപിച്ച് സിപിഎം തിരുവനന്തപുരം ജില്ലാ സെക്രട്ടറി വി. ജോയ്, കടകംപള്ളി സുരേന്ദ്രൻ എന്നിവർക്കെതിരെ കേസെടുത്തിട്ടുണ്ട്. ഉദ്യോഗസ്ഥർക്കെതിരെ സൈബർ ഇടങ്ങളിലും പ്രതിഷേധം ശക്തമാണ്.