മുഖ്യമന്ത്രി വിഡി സതീശൻ മാധ്യമങ്ങളോട് പ്രതികരിക്കുന്ന രീതി മാറ്റും? വാർത്താ സമ്മേളനങ്ങളിൽ പുതിയ ക്രമീകരണങ്ങൾ കൊണ്ടുവന്നേക്കും

തിരുവനന്തപുരം: മുഖ്യമന്ത്രി വി.ഡി. സതീശന്റെ മാധ്യമ പ്രതിച്ഛായ മെച്ചപ്പെടുത്തുന്നതിന്റെ ഭാഗമായി വാർത്താസമ്മേളനങ്ങളിൽ പുതിയ ക്രമീകരണങ്ങൾ ഏർപ്പെടുത്താൻ നീക്കം. മാധ്യമപ്രവർത്തകർക്ക് പ്രത്യേക മൈക്ക് നൽകാനും, അതിലൂടെ ഉന്നയിക്കുന്ന ചോദ്യങ്ങൾക്ക് മാത്രം മറുപടി നൽകാനുമാണ് ആലോചന. പി.ആർ.ഡിയുമായി (PRD) ആലോചിച്ചായിരിക്കും ഇതിൽ അന്തിമ തീരുമാനമെടുക്കുക.

സമീപകാലത്ത് ഇടുക്കിയിലടക്കം മുഖ്യമന്ത്രി നടത്തിയ ക്ഷോഭപ്രകടനങ്ങൾ മാധ്യമങ്ങളിൽ വലിയ ചർച്ചയായിരുന്നു. ഇത്തരം സംഭവങ്ങൾ ഭരണത്തലവന്റെ പ്രതിച്ഛായയെ ബാധിക്കുന്നുണ്ടെന്ന വിലയിരുത്തലിനെ തുടർന്നാണ് മാറ്റങ്ങൾക്ക് വഴിയൊരുങ്ങുന്നത്. വഴിയിൽ വെച്ചും മറ്റുമുള്ള അപ്രതീക്ഷിത പ്രതികരണ ശൈലി ഒഴിവാക്കാനും, മാധ്യമങ്ങൾ ഉന്നയിക്കുന്ന ചോദ്യങ്ങൾക്ക് കൃത്യമായ മറുപടി നൽകാനാകാത്ത സാഹചര്യങ്ങൾ വാർത്തയാകുന്നത് തടയാനും പുതിയ ക്രമീകരണം ലക്ഷ്യമിടുന്നു.

വാർത്താസമ്മേളനങ്ങളിൽ ഒരേസമയം ഒന്നിലധികം ചോദ്യങ്ങൾ ഉയർന്നുവരുന്നത് മൂലം ഉണ്ടാകുന്ന ബഹളവും വ്യക്തതക്കുറവും ഒഴിവാക്കാനാണ് ചോദ്യം ചോദിക്കാൻ മൈക്ക് നൽകുന്നത്. ഇത്തരം സന്ദർഭങ്ങളിൽ മൈക്കിലൂടെയുള്ള ചോദ്യങ്ങൾക്ക് മാത്രമായിരിക്കും മുഖ്യമന്ത്രി മറുപടി നൽകുക. മുൻ മുഖ്യമന്ത്രി പിണറായി വിജയൻ കോവിഡ് കാലത്ത് വാർത്താസമ്മേളനങ്ങളിൽ നടപ്പിലാക്കിയിരുന്ന രീതിക്ക് സമാനമാണിത്.