കെ.എം. ഷാജി സ്വകാര്യ വാഹനത്തിൽ യാത്ര ചെയ്യുന്നതിൽ തെറ്റില്ലെന്ന് ​ഗണേഷ് കുമാർ, 'സതീശൻ സ്പോൺസറെ വെളിപ്പെടുത്തണം'

ഇടുക്കി: എം.എൽ.എ കെ.എം. ഷാജി സ്വകാര്യ വാഹനത്തിൽ യാത്ര ചെയ്തതിൽ തെറ്റില്ലെന്ന് മുൻ മന്ത്രി കെ.ബി. ഗണേഷ് കുമാർ പറഞ്ഞു. എന്നാൽ അതിനായി പ്രത്യേക അനുമതി വാങ്ങുകയോ എം.എൽ.എ ബോർഡ് വെച്ച് യാത്ര ചെയ്യുകയോ ചെയ്യേണ്ടതായിരുന്നുവെന്നും അദ്ദേഹം വ്യക്തമാക്കി. താനും എം.എൽ.എ ആയിരിക്കെ ഇത്തരത്തിൽ യാത്ര ചെയ്തിട്ടുണ്ടെന്നും ഗണേഷ് കുമാർ പറഞ്ഞു. എം.എൽ.എ ഫണ്ട് ഉപയോഗിച്ച് കെ.എസ്.ആർ.ടി.സിക്ക് ബസുകൾ വാങ്ങുന്നതിൽ തെറ്റില്ലെന്നും അദ്ദേഹം അഭിപ്രായപ്പെട്ടു. ലാഭകരമായ റൂട്ടുകളിൽ സർവീസ് നടത്തണമെന്നും, ബസുകൾ വാങ്ങിയതുകൊണ്ട് മാത്രം കെ.എസ്.ആർ.ടി.സി രക്ഷപ്പെടില്ലെന്നും അദ്ദേഹം കൂട്ടിച്ചേർത്തു. അതേസമയം, പ്രതിപക്ഷ നേതാവ് വി.ഡി. സതീശൻ നടത്തിയ സൗജന്യ യാത്രയെ ഗണേഷ് കുമാർ വിമർശിച്ചു. 20 ലക്ഷം രൂപയുടെ സൗജന്യ യാത്രയ്ക്ക് സ്പോൺസർ ആരാണെന്ന് വെളിപ്പെടുത്തണമെന്നും, ഇത്തരത്തിലുള്ള സൗജന്യ യാത്ര അഴിമതിയുടെ പരിധിയിൽ വരുമെന്നും അദ്ദേഹം ആരോപിച്ചു.