അടൂർ പ്രകാശിന്‍റെ തുടർനീക്കം എന്തെന്നതിൽ കോൺഗ്രസ്സിൽ ആകാംക്ഷ; എഐസിസിക്ക് കത്ത് നൽകുമോ?

തിരുവനന്തപുരം: സംസ്ഥാനത്ത് യുഡിഎഫ് സർക്കാർ അധികാരത്തിലേറി നാലാം മാസത്തിലേക്ക് കടക്കുമ്പോൾ മുഖ്യമന്ത്രി വി.ഡി. സതീശനും യുഡിഎഫ് കൺവീനർ അടൂർ പ്രകാശും തമ്മിലുള്ള പോര് മറനീക്കി പുറത്തേക്ക്. മുഖ്യമന്ത്രിയുടെ ഏകപക്ഷീയമായ പ്രവർത്തനരീതിക്കെതിരെ കെപിസിസി ആസ്ഥാനത്ത് വാർത്താസമ്മേളനം വിളിച്ച് പരസ്യ വിമർശനം ഉന്നയിച്ച അടൂർ പ്രകാശിന്റെ തുടർനീക്കം എന്തെന്നതിൽ കോൺഗ്രസ് നേതൃത്വത്തിലും മുന്നണിയിലും ആകാംക്ഷ പുകയുകയാണ്.

അതൃപ്തി ഔദ്യോഗികമായി എഐസിസിയെ അറിയിക്കുമെന്ന് അടൂർ പ്രകാശ് വ്യക്തമാക്കിയതോടെ ഡൽഹി നേതൃത്വത്തിന് പരാതി നൽകുമോ എന്നാണ് പാർട്ടി ഉറ്റുനോക്കുന്നത്. മുന്നണിയിൽ കൃത്യമായ കൂടിയാലോചനകൾ നടക്കുന്നില്ലെന്നും, ബോർഡ്-കോർപറേഷൻ പദവികളും ഡോ. എം.കെ. മുനീറിനുള്ള ക്യാബിനറ്റ് പദവിയടക്കമുള്ള സുപ്രധാന തീരുമാനങ്ങളും താൻ അറിയുന്നത് മാധ്യമങ്ങളിലൂടെയാണെന്നുമാണ് കൺവീനറുടെ പ്രധാന ആരോപണം.

പ്രതിരോധിക്കാൻ വി.ഡി.എസ് വിഭാഗം

അടൂർ പ്രകാശ് എഐസിസിക്ക് കത്തു നൽകിയാൽ ശക്തമായ ബദൽ നീക്കത്തിനാണ് മുഖ്യമന്ത്രി വി.ഡി. സതീശനെ അനുകൂലിക്കുന്ന വിഭാഗത്തിന്റെ തീരുമാനം. കൺവീനർ മുന്നണിയുടെ നിഷ്ക്രിയത്വത്തിന് കാരണക്കാരനാണെന്നും വാർത്താസമ്മേളനം വിളിച്ച് പരസ്യ നിലപാട് എടുത്തത് അച്ചടക്കലംഘനമാണെന്നും ചൂണ്ടിക്കാട്ടി ഹൈക്കമാൻഡിന് മറുപടി നൽകാനാണ് വിഡിഎസ് ചേരിയുടെ നീക്കം. മന്ത്രി കെ. മുരളീധരൻ അടക്കമുള്ളവർ നിലവിലെ നിയമനങ്ങൾ മുന്നണിയുടെ ഏകകണ്ഠമായ തീരുമാനമായിരുന്നു എന്ന് വ്യക്തമാക്കി അടൂർ പ്രകാശിന്റെ വാദങ്ങളെ തള്ളി രംഗത്തെത്തിയിട്ടുണ്ട്.

സതീശന്റെ ശൈലിക്കെതിരെ കൂടുതൽ നേതാക്കൾ?

അതേസമയം, അടൂർ പ്രകാശിന്റെ വിമർശനങ്ങൾക്ക് എഐസിസി ജനറൽ സെക്രട്ടറി കെ.സി. വേണുഗോപാലിന്റെയും ബെന്നി ബെഹനാന്റെയും പ്രതികരണങ്ങളിൽ പരോക്ഷ പിന്തുണയുണ്ടെന്നാണ് വിലയിരുത്തൽ. കാര്യങ്ങൾ പാർട്ടി വേദിയിൽ ചർച്ച ചെയ്യുമെന്നാണ് നേതാക്കൾ പ്രതികരിച്ചത്.

ഡിവൈഎഫ്ഐ പ്രതിഷേധവും മറ്റു രാഷ്ട്രീയ വിഷയങ്ങളും മുൻനിർത്തി പ്രതിപക്ഷം സർക്കാറിനെതിരെ കടന്നാക്രമണം ശക്തമാക്കുന്നതിനിടെ കോൺഗ്രസിനുള്ളിൽ തന്നെ ഉയർന്ന പടയൊരുക്കം സതീശൻ സർക്കാറിന് തലവേദനയായിട്ടുണ്ട്. അതൃപ്തികൾ പരസ്യമായ പശ്ചാത്തലത്തിൽ വരും ദിവസങ്ങളിൽ എഐസിസി നേതൃത്വത്തിന്റെ ഇടപെടൽ ഉണ്ടാകുമോ എന്നാണ് രാഷ്ട്രീയ കേരളം ഉറ്റുനോക്കുന്നത്.