കേരളം വാർത്തകൾ

യു.ഡി.എഫിൽ കൂടിയാലോചനകൾ നടക്കുന്നില്ലെന്ന പരാതിയുമായി യു.ഡി.എഫ് കൺവീനർ അടൂർ പ്രകാശ് എം.പി ഹൈക്കമാൻഡിനെ കാണാൻ തിങ്കളാഴ്ച ഡൽഹിയിലെത്തും. അടൂർ പ്രകാശിന്റെ പരസ്യവിമർശനവും സംസ്ഥാനത്തെ പാർട്ടിയിലെ നിലവിലെ സ്ഥിതിഗതികളും എ.ഐ.സി.സിയെ ധരിപ്പിക്കാൻ കെ.പി.സി.സി പ്രസിഡന്റ് സണ്ണി ജോസഫും ഡൽഹിയിലെത്തുന്നുണ്ട്.

മന്ത്രിമാർ സമരക്കാരോട് പ്രശ്നമുണ്ടാക്കുന്ന രീതി ശരിയല്ലെന്നും താൻ സമരക്കാരെ അടിക്കണമെന്നാണോ ആഗ്രഹിക്കുന്നതെന്നും യുവമോർച്ചയുടെ കരിങ്കൊടി പ്രതിഷേധത്തിൽ മന്ത്രി കെ എം ഷാജി പ്രതികരിച്ചു. കഴിഞ്ഞ സർക്കാരിനെപ്പോലെയല്ല ജനാധിപത്യപരമായി സമരങ്ങളെ നേരിടുന്ന പോളിസിയാണ് യുഡിഎഫിനുള്ളതെന്നും കറുപ്പ് തനിക്ക് പ്രിയപ്പെട്ട നിറമാണെന്നും അദ്ദേഹം വ്യക്തമാക്കി.

വൈദ്യുതി മുടങ്ങി ഇൻവെർട്ടറിന്റെ ചാർജ് തീർന്നതിനെ തുടർന്ന് കൃത്രിമ ഓക്സിജൻ ലഭിക്കാതെ അതിഞ്ഞാലിലെ വയോധിക മരിച്ചു. വൈദ്യുതി വകുപ്പിന്റെ ഗുരുതര അനാസ്ഥയാണ് മരണത്തിന് കാരണമെന്ന് ആരോപിച്ച് നാട്ടുകാരും ബന്ധുക്കളും രംഗത്തെത്തി.

വിഴിഞ്ഞം അന്താരാഷ്ട്ര തുറമുഖ നിർമാണവുമായി ബന്ധപ്പെട്ട മത്സ്യത്തൊഴിലാളികളുടെ ആശങ്കകൾ പരിഹരിക്കാൻ 235 മീറ്റർ പുലിമുട്ടും 500 മീറ്റർ ബെർത്തുമുള്ള പുതിയ ഫിഷിങ് ഹാർബറിന് സർക്കാർ തത്വത്തിൽ ഭരണാനുമതി നൽകി. അദാനി വിഴിഞ്ഞം പോർട്ട് പ്രൈവറ്റ് ലിമിറ്റഡ് വഴി നടപ്പാക്കുന്ന ഒന്നാം ഘട്ട പദ്ധതി ബോട്ടുകൾക്ക് സുരക്ഷിത ബെർത്തിങ്ങിനും ലാൻഡിങ്ങിനും സഹായകരമാകും.